4 ოქტომბრის საქმეზე პროკურატურასთან საპროცესო შეთანხმებას კიდევ 8 ბრალდებული გააფორმებს. საპროცესო შეთანხმება 3-წლიან პირობით მსჯავრს გულისხმობს. როკურატურის ცნობით, სხვა ბრალდებულების მსგავსად ამ რვამაც "აღიარა და მოინანია დანაშაული". იმ შემთხვევაში თუ სასამართლო დაამტკიცებს საპროცესო შეთანხმებას, ისინი სასამართლო დარბაზიდანვე გათავისუფლდებიან.

საპროცესო შეთანხმებას გააფორმებენ ალექსანდრე გოგოლაძე, სულხან აბრალავა, ევა შაშიაშვილი, გოჩა ყატაშვილი, დავით ღურწკაია, ჯანდრი თირქიამ რამაზ ჯორბენაძე და
გენადი კელიხაშვილი.

ცნობისთვის, 2025 წლის 31 დეკემბერს ევა შაშიაშვილს აღკვეთის ღონისძიების სახით შეფარდებული პატიმრობა 5 000-ლარიანი არასაპატიმრო გირაოთი შეეცვალა და რუსთავის ქალთა პენიტენციურ დაწესებულება დატოვა.

"პროკურატურის პოზიცია ასეთია — ნებისმიერი პირი, რომელიც აღიარებს ჩადენილ დანაშაულს და მოგვმართავს განცხადებით, რომ მას გაუფორმდეს საპროცესო შეთანხმება, ჩვენ მზად ვართ, მასთან ვიმსჯელოთ საპროცესო შეთანხმების გაფორმების თაობაზე. იმ დარჩენილმა შვიდმა პირმა სასამართლო პროცესზე განაცხადა, რომ არ აღიარებენ ჩადენილ დანაშაულს და თავს არ ცნობენ დამნაშავედ, შესაბამისად, მათთან არ მიმდინარეობს მოლაპარაკება საპროცესოს თაობაზე, თუმცა თუ შეიცვლიან პოზიციას, აღიარებენ ბრალს, თავს ცნობენ დამნაშავედ მთლიან ბრალდებაში… რა თქმა უნდა, მზად ვართ, მათთანაც განვიხილოთ შეთანხმების საკითხი," — განაცხადა საქმის პროკურორმა როინ ხინთიბიძემ. (წყარო "პუბლიკა")

15-პირიან საქმეზე საპროცესო შეთანხმებაზე 7 ბრალდებული საპროცესო შეთანხმების პირობებს არ ეთანხმება, ესენი არიან — დავით ჟღენტი, ზაქრო ალბუთაშვილი, კახაბერ მჟავანაძე, დავით სტურუა, გოგი ჩახუნაშვილი და ია დარახველიძე.

2025 წლის 11 ოქტომბერს სასამართლომ ია დარახველიძეს აღმკვეთი ღონისძიების სახით 10 000-ლარიანი გირაო შეუფარდა, რომლის გადახდის შემდეგ მან იზოლატორი დატოვა. პროკურატურა დარახველიძისთვის აღმკვეთი ღონისძიების სახით პატიმრობას ითხოვდა. მოგვიანებით სასამართლო პროცესზე ცნობილი გახდა, რომ დარახველიძეს ეპილეფსიური შეტევა ჰქონდა იზოლატორში. ის ამ დროისთვის დუმილის უფლებას იყენებს.

დავით ჟღენტის ადვოკატის, ლაშა ცუცქირიძის განცხადებით, ჟღენტისთვის მიუღებელია აღიაროს ის დანაშაული, რაც არ ჩაუდენია.

"მე არ მინდა, რამე ვთქვა ბრალდებულებზე, ვინც პოზიცია დააფიქსირეს საპროცესო შეთანხმების გაფორმებასთან დაკავშირებით, ვინაიდან მიმაჩნია, რომ არც ერთ მათგანზე არ არსებობდა საკმარისი მტკიცებულებები, თუმცა დავითის შინაგანი მე, მისი პრინციპული პოზიცია კარნახობდა, რომ იგი ვერანაირად ვერ აღიარებდა იმას, რაც არ ჩაუდენია," — განაცხადა ლაშა ცუცქირიძემ.

ამას გარდა, 2 ივნისს ცნობილი გახდა, რომ პროკურატურა 4 ოქტომბრის საქმეზე დაკავებულ 7 პირს საპროცესო შეთანხმებას გაუფორმებს. ბრალდებულები საპროცესო შეთანხმების გაფორმებისთანავე სასამართლო დარბაზიდან გათავისუფლდებიან.