"საქართველო მნიშვნელოვან პარტნიორად რჩება, რომლის გარეშეც 3+3-ის პერსპექტივები სრულად ვერ განხორციელდება", — ამის შესახებ რუსეთის საგარეო საქმეთა მინისტრის მოადგილემ, მიხაილ გალუზინმა, სანქტ-პეტერბურგის საერთაშორისო ეკონომიკურ ფორუმზე (SPIEF) განაცხადა. მან ისიც თქვა, რომ მიესალმება "დისკუსიაში ქართული ექსპერტული წრეების წარმომადგენლის მონაწილეობას".

"განსაკუთრებით მინდა მივესალმო ჩვენს დისკუსიაში ქართული ექსპერტული წრეების წარმომადგენლის მონაწილეობას. ჩვენთვის, როგორც დარწმუნებული ვარ პლატფორმის ყველა მონაწილისთვის, საქართველო მნიშვნელოვან პარტნიორად რჩება, რომლის გარეშეც 3+3-ის პერსპექტივები სრულად ვერ განხორციელდება. იმედი მაქვს, რომ დროთა განმავლობაში ოფიციალური თბილისიც შემოუერთდება ჩვენს მუშაობას", — დასძინა გალუზინმა.

როგორც რუსული მედია წერს, რუსეთი ელის, რომ სამხრეთ კავკასიის საკითხზე "3+3" ფორმატის შემდეგი შეხვედრა საგარეო საქმეთა მინისტრების დონეზე ბაქოში ან ერევანში გაიმართება.

"ჩვენ ველით, რომ შემდეგი მინისტერიალის შეხვედრა ბაქოში ან ერევანში გაიმართება. როგორც ჩვენთვის ცნობილია, ამ საკითხზე მოლაპარაკებები ჩვენს აზერბაიჯანელ და სომეხ კოლეგებს შორის მიმდინარეობს", — განაცხადა მან სესიაზე "3+3 პლატფორმა: საერთო გამოწვევები და სტრატეგიული პარტნიორობა".

ცნობისათვის, IPN-ს 4 ივნისს საქართველოს საგარეო უწყებაში განუცხადეს, რომ საქართველო "3+3 ფორმატის" შეხვედრაში, რომელიც სანქტ-პეტერბურგში გაიმართება, მონაწილეობას არ მიიღებს.

"საქართველოს პოზიცია ცნობილია, არაერთხელ დაუფიქსირებია ქართულ მხარეს. საქართველოს არასდროს მიუღია მონაწილეობა აღნიშნული ფორმატის შეხვედრებში", — აღნიშნავენ საგარეო უწყებაში.

შეგახსენებთ, რომ "3+3 პლატფორმა" (ე.წ. ექვსი ერის პლატფორმა) არის რეგიონული თანამშრომლობის ფორმატი, რომელიც აერთიანებს სამხრეთ კავკასიის სამ ქვეყანას (საქართველო, აზერბაიჯანი, სომხეთი) და მათ სამ მეზობელ სახელმწიფოს (რუსეთი, თურქეთი, ირანი). პლატფორმის მიზანია რეგიონში ეკონომიკური, სატრანსპორტო, სავაჭრო და პოლიტიკური კავშირების გაძლიერება. ინიციატივა 2020 წლის ყარაბაღის მეორე ომის დასრულების შემდეგ, თურქეთის პრეზიდენტმა რეჯეფ თაიფ ერდოღანმა და აზერბაიჯანის პრეზიდენტმა ილჰამ ალიევმა წამოაყენეს. პლატფორმის პირველი შეხვედრა 2021 წლის დეკემბერში მოსკოვში შედგა. მიუხედავად იმისა, რომ 5 ქვეყანა რეგულარულად მართავს მინისტრების დონის შეხვედრებს და აღნიშნავს, რომ პლატფორმა საქართველოსთვისაც ღიაა, ჩვენი ქვეყანა აღნიშნულ ფორმატში შეხვედრებს ამ დრომდე არ დასწრებია.