რუსეთი სამუშაო ასაკის 12 წლამდე დაწევას და საბჭოთა პერიოდის ბავშვთა შრომითი ბანაკების აღდგენას განიხილავს, რათა უკრაინაში ომით გამოწვეული სამუშაო ძალის დეფიციტი შეამსუბუქოს — ინფორმაციას The Telegraph ავრცელებს.

ინიციატივა მოსკოვის ბავშვთა ომბუდსმენს ეკუთვნის. მისი აზრით, "თითქმის ყველა მოზარდს ზაფხულში დასაქმება სურს". ოლგა იაროსლავსკაიას განცხადებით, შრომითი ბანაკები მოზარდებს "სამუშაოს და დღის რეჟიმს" შესთავაზებს, განსაკუთრებით მათ, ვისი მშობლებიც შვილებისთვის სამთვიანი არდადეგების მოწყობას ვერ ახერხებენ.

"როდესაც 12 წლისა და უფროსი ასაკის მოზარდებს ვესაუბრებით, თითქმის ყველა ამბობს, რომ ზაფხულში მუშაობა სურს," — განაცხადა იაროსლავსკაიამ ბავშვთა უსაფრთხოების საკითხებზე გამართულ პრესკონფერენციაზე და საბჭოთა ახალგაზრდულ ბანაკში მუშაობის საკუთარ გამოცდილებაზე ისაუბრა.

"მეშვიდე კლასში პომიდვრის ნაკვეთებში სარეველების მოსაცილებლად წაგვიყვანეს. 40-გრადუსიან სიცხეში მინდვრების შუაგულში მდებარე ბარაკებში ვცხოვრობდით. გადავრჩით და მეტიც, სახლში 120 რუბლი მივიტანე," — განაცხადა ომბუდსმენმა.

რუსეთის მოქმედი შრომითი კანონმდებლობით, ბავშვებს 14 წლიდან შეუძლიათ მუშაობა მშობლების წერილობითი თანხმობით, ხოლო 15 წლიდან შრომითი ხელშეკრულების დამოუკიდებლად გაფორმების უფლებაც აქვთ.

ეკონომისტების შეფასებით, რუსეთში სამუშაო ძალის დეფიციტი იმდენად მწვავეა, რომ დასუსტებულ ეკონომიკაზე ცუდ გავლენას იქონიებს. მიუხედავად იმისა, რომ ვლადიმირ პუტინი უმუშევრობის ისტორიულად დაბალი, 2%-იანი მაჩვენებლით ამაყობს, მუშახელის შემცირებამ დამსაქმებლები აიძულა, თანამშრომლების მოსაზიდად ხელფასები გაეზარდათ, რაც მომხმარებლებისთვის ფასების ზრდასა და ბიზნესებისთვის მოგების შემცირებას იწვევს.

The Telegraph-ის ინფორმაციით, ნახევარ განაკვეთზე მუშაობა ერთადერთი საქმე არ იქნება, რითაც რუსი ბავშვები ზაფხულის არდადეგებზე დაკავდებიან. მოსკოვის განათლების სამინისტრომ სკოლის მოსწავლეებისთვის სავალდებულო საზაფხულო საკითხავი ლიტერატურის სია გამოაქვეყნა, რომელშიც რამდენიმე ისეთი ტექსტიც მოხვდა, რომლებიც უკრაინაში ომსა და იქ მყოფ რუს სამხედროებს ადიდებს იმ ფონზე, როდესაც რუსეთის არმია რეკორდული ტემპით კარგავს სამხედრო პერსონალს.