2026 წლის 5 ივნისს, გარემოს დაცვის საერთაშორისო დღეს კომპანია კოკა-კოლა ბოთლერს ჯორჯიასა და ქალაქ ბათუმის სანდასუფთავების ორგანიზებით ბათუმში დასუფთავების მასშტაბური აქცია გაიმართა.

აქციის მთავარი გზავნილი იყო — ბათუმი — სუფთა და მწვანე გარემოსთვის, მიზანი კი რამდენიმე: ზღვისპირა ქალაქის სანაპირო ზოლის, პარკებისა და საზოგადოებრივი სივრცეების დასუფთავება, გარემოში არამართული პლასტმასისა და სხვადასხვა მუნიციპალური ნარჩენის შემცირება და კლიმატის ცვლილების საკითხზე საზოგადოების ცნობიერების ამაღლება.

გარემოს დაცვის საკითხი და მწვანე გარემო კოკა-კოლა ბოთლერს ჯორჯიასთვის ყველაზე მნიშვნელოვანია, რადგან კომპანია მთავარ პასუხისმგებლობად მიიჩნევს ბუნებრივი რესურსების დაცვას, ნარჩენების შემცირებასა და გადამუშავების კულტურის დანერგვას. მსგავსი გარემოსდაცვითი ინიციატივით კოკა-კოლა ხელს უწყობს, როგორც პლასტმასის ნარჩენების შემცირებას, ისე საზოგადოების ცნობიერების ამაღლებას კლიმატის ცვლილებისა და ეკოლოგიური პასუხისმგებლობის კუთხით.

აქციამ ახალგაზრდები, სტუდენტები, კერძო სექტორისა და ადგილობრივი სამსახურები საერთო გარემოსდაცვითი მიზნის გარშემო გააერთიანა. ღონისძიებაში კოკა-კოლა ბოთლერს ჯორჯიას ბათუმის წარმომადგენლობა, ქალაქ ბათუმის სანდასუფთავება, ბათუმის შოთა რუსთაველის სახელმწიფო უნივერსიტეტის სტუდენტები და მოხალისეები ჩაერთნენ.

5 ივნისს დასუფთავების აქცია ბათუმში მდინარე ჭოროხის მარჯვენა შესართავთან (ახალი ბულვარი) გაიმართა. შეგროვებული ნარჩენები დახარისხდა. პლასტმასის ნარჩენი ცალკე გამოიყო და გადამამუშავებელ კომპანიას რეციკლირებისთვის გადაეცა, შერეული საყოფაცხოვრებო ნარჩენები კი ბათუმის დასუფთავების სამსახურმა ნაგავსაყრელზე გაიტანა.

ნარჩენების სეპარირებული შეგროვებით საზოგადოების გარემოსდაცვითი პასუხისმგებლობა ძლიერდება და ნარჩენების გადამუშავების კულტურის დამკვიდრებას უწყობს ხელს. ეს კი გრძელვადიან პერსპექტივაში გარემოს დაბინძურების შემცირებას, რესურსების ეფექტიან გამოყენებასა და ეკოლოგიურად პასუხისმგებელი საზოგადოების ფორმირებას უზრუნველყოფს.

გარემოს დაცვის საერთაშორისო დღე — 2026

გარემოს დაცვის საერთაშორისო დღე გაეროს გარემოსდაცვითი პროგრამის (UNEP) ხელმძღვანელობით 1973 წელს დაფუძნდა და ის 5 ივნისს აღინიშნება. გარემოს დაცვის საერთაშორისო დღე მსოფლიოში ერთ-ერთი ყველაზე მნიშვნელოვანი გარემოსდაცვითი პლატფორმაა. 2026 წლის მთავარი თემა კლიმატის ქმედებაა, რითაც კლიმატის ცვლილებით გამოწვეულ გლობალურ პრობლემებზე — მზარდ ტემპერატურაზე, ეკოსისტემების დეგრადაციასა და ექსტრემალურ ამინდზე კეთდება აქცენტი.

ეს თემა ხაზს უსვამს ბუნების დაცვისა და კლიმატის ქმედების მნიშვნელოვან კავშირს და მოუწოდებს მთავრობებს, ინდუსტრიებსა და საზოგადოებას, ბუნებაზე დაფუძნებული გადაწყვეტილებები მიიღონ და განახლებად ენერგიასა და მწვანე ეკონომიკაზე გადასვლა დააჩქარონ.

კომპანია კოკა-კოლა ბოთლერს ჯორჯიას მიერ ორგანიზებულმა ბათუმის დასუფთავების აქციამ სწორედ ამ გლობალურ გზავნილს უპასუხა და გარემოს დაცვის საკითხებში საზოგადოების უფრო აქტიურ მონაწილეობასა და ცნობიერების ამაღლებას შეუწყო ხელი.