დიუშენის კუნთოვანი დისტროფიით დაავადებული ბავშვების მშობლებთან შეხვედრის შემდეგ, ირაკლი კობახიძემ ბრიფინგი გამართა. მისი განცხადებით, ისინი მშობელბთან შეჯერდნენ კონკრეტულ მედიკამენტებზე და სამუშაო ჯგუფი ამ მედიკამენტების უზრუნველყოფის კუთხით მუშაობას დაიწყებს.

შეხვედრიდან გამოსულმა დიუშენით დაავადებული ბავშვების მშობლებმა ჟურნალისტებთან განაცხადეს, რომ კანცელარიასთან ყოველდღიურ აქციებს წყვეტენ და კვირას მადლობის მარშს გამართავენ.

დიუშენის სინდრომით დაავადებული ბავშვის მამის, ზაქრო გვიშიანის განცხადებით, მშობლების ორწლიანი ბრძოლისა და მთავრობის კანცელარიის შენობის წინ გათენებული 46 ღამის შემდეგ, გამარჯვება მიღწეულია. მშობლების თქმით, საუბარია ორ მედიკამენტზე, თუმცა მათ დასახელებაზე ჯერჯერობით თავს იკავებენ.

"ამ ღირსეულ და ძალიან დიდ ბრძოლაში გამარჯვება მიღწეულია. ვულოცავ ყველა მშობელს, ყველა პაციენტს, ყველა ჩვენს გულშემატკივარს, რომლებიც მხარს გვიჭერდნენ ამ დიდ და ღირსეულ ბრძოლაში. დღევანდელ შეხვედრაზე მიღწეული იქნა გადაწყვეტილება იმასთან დაკავშირებით, რომ შეიქმნება მუდმივი სამუშაო ჯგუფი, რომელიც კონკრეტულ მედიკამენტებთან მიმართებაში იმუშავებს. საუბარია ორ მედიკამენტზე. იქნება აქტიური მუშაობა ფარმაცევტულ კომპანიებთან, საბოლოო ჯამში იქნება მიღებული გადაწყვეტილება საუკეთესო პირობების შესაბამისად, რაც დაკავშირებული იქნება ბავშვებთან მიმართებაში, დიაგნოზთან მიმართებაში და ყველა ის გარემოება იქნება გათვალისწინებული, რაც აუცილებელია ამ პროცესში," — განაცხადა დიუშენით დაავადებული ბავშვის მშობელმა, ზაქრო გვიშიანმა ჟურნალისტებთან საუბრისას.

მთავრობის კანცელარიასთან მყოფი მშობლების ჩვენთან საუბრისას აცხადებდნენ, რომ დღეს ისტორიული დღე იყო, რადგან "პროცესი დაიწყო და მედიკამენტებთან დაკავშირებით ქმედითი ნაბიჯები გადაიდგა". მიღწეული შედეგისთვის კი ყველას მადლობას უხდიან:

"დღევანდელი დღე არის ძალიან ემოციური და ისტორიულიც. დღეს დაიწყო პროცესი და ქმედითი ნაბიჯები გადაიდგა მედიკამენტებთან დაკავშირებით. საკმაოდ დიდი გზა გავიარეთ ამ ყველაფერთან მოსასვლელად.

მთავარი პროცესი დაიწყება რამდენიმე მედიკამენტით და მერე უკვე ეს გუნდი, რომელიც აქტიურად იმუშავებს ამ მიმართულებით, რა თქმა უნდა, ყველა იმ თანამედროვე და მომავალში არსებულ მედიკამენტებსაც მივიღებთ ერთმნიშვნელოვნად. მადლობა ყველას," — აცხადებს ირაკლი კობახიძესთან შეხვედრის შემდეგ დიუშენის კონთოვანი დისტროფიით დაავადებული ბავშვის მშობელი.