რუსთავში, გარეჯის ქუჩაზე, 16 წლის ბიჭმა 40 წლის კაცი ცივი იარაღით მოკლა. მომხდარზე 1 პირი დააკავეს. გამოძიება სსსკ 108-ე მუხლით მიმდინარეობს, რაც განზრახ მკვლელობას გულისხმობს და 15 წლამდე ვადით თავისუფლების აღკვეთას ითვალისწინებს. ინფორმაციას "ინფო რუსთავი" ავრცელებს.

არასრულწლოვანის ოჯახის წევრები "ტვ პირველთან" საუბრისას აცხადებენ, რომ კაცმა სკოლის მოსწავლე სახლში ჩაკეტა და მასზე სექსუალურ ძალადობას ცდილობდა, რა დროსაც მოზარდმა ის ცივი იარაღით დაჭრა. მომხდარის შემდეგ არასრულწლოვანი პოლიციას ჩაბარდა.

"სახლი 2 დღის ნაქირავები ჰქონია იმ კაცს. როგორც კი აიყვანა ბავშვი, კარები გადაუკეტავს და დაუწყია ძალადობა, ტანსაცმელს ხდიდა და ეჯაჯგურებოდა. სამზარეულოში ყოფილან, ბავშვს მაგიდაზე სამზარეულოს დანა დაუნახავს, აუღია და თავდაცვის მიზნით მოუქნევია. მაინც არ ანებებდა თავს. დაჭრილიც კი ცდილობდა ეძალადა სექსუალურად ბავშვზე. პედოფილია, თორე სხვანაირად როგორ უნდა იძალადო ბიჭზე, თან 15 წლის მოზარდზე. პირდაპირ ეუბნებოდა, რაც სურდა მისგან. ამ კაცს არავინ იცნობდა აქ. 2 დღის ჩამოსული იყო აზერბაიჯანიდან და იძახდა მშენებელი ვარო," — ამბობს ოჯახის წევრი.

ოჯახის განცხადებით, არასრულწლოვანს წინასწარი პატიმრობა არ უნდა შეეფარდოს, რადგან ის თავს იცავდა.