უნგრეთის მთავრობა საქართველოს, სომხეთის და ფილიპინების მოქალაქეებისთვის სამუშაო ვიზების გაცემას წყვეტს — ინფორმაციას Reuters ავრცელებს. მთავრობის პრესსპიკერის, ვანდა სონდის განაცხადებით, აღნიშნული გადაწყვეტილება უცხოელი მუშახელის ნაკადის რეგულირებისკენ გადადგმული პირველი ნაბიჯია.

ვანდა სონდის თქმით, ხელისუფლება უცხოელი მუშაკებისთვის დასაქმების შესაძლებლობების გამკაცრებას გეგმავს, რადგან მიიჩნევს, რომ ისინი ადგილობრივ ხელფასებზე გავლენას ახდენენ.

ოფიციალური სტატისტიკის მიხედვით, უცხოელი მუშაკები უნგრეთის სამუშაო ძალის მხოლოდ 2%-ს შეადგენენ, თუმცა ზოგიერთი სექტორი, მათ შორის მომსახურებისა და წარმოების სფეროები, მათზე მნიშვნელოვნადაა დამოკიდებული.

უნგრეთის მთავრობა ასევე შეცვლის იმ დადგენილებასაც, რომელიც დასაქმების სააგენტოებს ფილიპინებიდან, საქართველოდან და სომხეთიდან მუშაკების გამარტივებული წესით ჩამოყვანის საშუალებას აძლევდა.

უნგრეთში უკვე მყოფ უცხოელ დასაქმებულებს ვიზის ვადის გაგრძელების მოთხოვნის წარდგენა კვლავ შეეძლებათ, ხოლო უკვე შეტანილი განაცხადები განხილული იქნება. მთავრობა აღნიშნულ ცვლილებებს უფრო ფართო და გრძელვადიანი გადაწყვეტისკენ გადადგმულ პირველ ნაბიჯად განიხილავს.