შალვა პაპუაშვილმა Facebook პოსტით უპასუხა ევროკავშირის უმაღლესი წარმომადგენლის/ ევროკომისიის ვიცე-პრეზიდენტის კაია კალასის და გაფართოების საკითხებში ევროკავშირის კომისრის მარტა კოსის განცხადებას საქართველოში არსებული სიტუაციის შესახებ. კალასი და კოსი სისხლის სამართლისა და ადმინისტრაციულ სამართალდარღვევათა კოდექსში რეპრესიული ცვლილებების დაჩქარებულ მიღებას აკრიტიკებდნენ.

"ადმინისტრაციულ სამართალდარღვევათა კოდექსში, სისხლის სამართლის კოდექსში და "შეკრებებისა და მანიფესტაციების შესახებ" კანონში ცვლილებების დაჩქარებული მიღება საქართველოს საზოგადოებაზე სერიოზულ ზეგავლენას მოახდენს. ეს ცვლილებები არსებითად გამოუთხრის ძირს გამოხატვის თავისუფლების და შეკრების თავისუფლების უფლებებს, ისევე როგორც მედიის თავისუფლებას.

ეს მოვლენები საქართველოს დემოკრატიული განვითარების სერიოზულ რეგრესს ასახავს და არ ამართლებს არანაირ მოლოდინს ევროკავშირის კანდიდატი ქვეყნის მიმართ", — ვკითხულობთ ევროკავშირის წარმომადგენლების განცხადებაში.

ქართული ოცნების პარლამენტის თავმჯდომარე ტრადიციულად აკრიტიკებს ევროკავშირის წარმომადგენლების განცხადებებს და მათ "არაინფორმირებულ და დაუსაბუთებელ ბრალდებებს" უწოდებს.

"გამაოგნებელია, რომ ნაცვლად შეცდომების აღიარებისა, ძალადობრივი აქციების დაგმობისა და ევროპის დემოკრატიის ფონდის (EED) ფინანსების გასაჯაროებისა, გვესმის არაინფორმირებული და დაუსაბუთებელი ბრალდებები საქართველოს მიმართ.

და ფარისევლობაა, როდესაც ინსტიტუციები, რომლებიც თავად არ აღიარებენ ეუთო/ოდირის საარჩევნო ანგარიშს, მოგვიწოდებენ კანონებზე ეუთო/ოდირის მომავალი ანგარიშების გათვალისწინებისკენ", — წერს პაპუაშვილი.