ცნობილი უკრაინელი მომღერალი ჯამალა რუსეთში ძებნილად გამოცხადდა. მუსიკოსი, რომლის ნამდვილი სახელი სუსანა ჯამალადინოვაა, რუსეთის შინაგან საქმეთა სამინისტროს ძებნილთა სიაში ოქტომბერში აღმოჩნდა, თუმცა, ადგილობრივი მედიისთვის ინფორმაცია ცოტა ხნის წინ გახდა ცნობილი.

მომღერლის ძებნილად გამოცხადების ოფიციალური მიზეზი უცნობია, მაგრამ გამოცემა Mediazona იუწყება, რომ ოკუპანტ ქვეყანაში ჯამალას რუსეთის სამხედრო ძალების შესახებ ყალბი ინფორმაციის გავრცელებაში სდებენ ბრალს.

გასული წლის თებერვალში უკრაინაში სრულმასშტაბიანი ომის დაწყებიდან დღემდე ჯამალა აქტიურად იყენებს თავის პლატფორმას რუსულ აგრესიაზე ცნობიერების ასამაღლებლად. მუსიკოსი არაერთ ქვეყანაში ჩავიდა და საქველმოქმედო კონცერტებშიც მიიღო მონაწილეობა. ამჟამად იგი ავსტრალიაში იმყოფება.

ჯამალამ, წარმოშობით ყირიმელმა თათარმა მომღერალმა, 2016 წელს ევროვიზიის სიმღერის კონკურსი მოიგო. მისი საკონკურსო სიმღერა 1944, ერთი მხრივ, ეხებოდა საბჭოურ ეპოქაში ყირიმელი თათრების მასობრივ რეპრესიებს (რომელშიც მომღერლის ბებიაც მოჰყვა), მეორე მხრივ კი, 2014 წელს რუსეთის მიერ ყირიმის რეგიონის ანექსიას ეხმაურებოდა.

"სადაც უნდა ვიყო, ჩემთვის მნიშვნელოვანი იქნება, სხვებს შევახსენო, რომ უცხოელები ჩემს სახლში შემოიჭრნენ, დახოცეს ადამიანები, გაანადგურეს და გადაწერეს ჩემი კულტურა", — განაცხადა ჯამალამ პრეზიდენტ ვოლოდიმირ ზელენსკისთან შეხვედრაზე შარშან, — "ეს ჯერ 1944-ში მოხდა, მერე — 2014-ში, ახლა კი ისევ მეორდება. უკრაინაში ახლა ყველას ესმის, რომ ეს ნებისმიერს შეიძლება შეეხოს, თუკი ბოროტებას არ შევაჩერებთ და ჩადენილი დანაშაულისთვის არ გავასამართლებთ".

ბოროტება კი 2016 წელს ჯამალას ევროვიზიაზე მონაწილეობასაც ეწინააღმდეგებოდა. მომღერლის საკონკურსო სიმღერა დუმის დეპუტატებმა მაშინ "რუსეთის წინააღმდეგ მიმართულ პოლიტიკურ გზავნილად შეაფასეს".

აღსანიშნავია, რომ ჯამალას გარდა, რუსეთში შესვლა 30-ზე მეტ უკრაინელ მომღერალს ეკრძალება. ამასთან, ქვეყანაში დაგმეს რუსი ხელოვანების პროტესტიც ომის წინააღმდეგ. რამდენიმე თვის წინ რუსეთში პუტინის პოლიტიკის მოწინააღმდეგე მწერალი დმიტრი გლუხოვსკი ძებნილად გამოცხადდა. "სახელმწიფო ღალატისთვის" მოითხოვეს მსახიობ ლია ახეჯაკოვას დასჯაც.

დისიდენტ ხელოვანებთან ბრძოლის პარალელურად, რუსეთში ალტერნატიული კულტურის შექმნასაც ცდილობენ. მაგალითისთვის, გაზაფხულზე გახდა ცნობილი, რომ ევროვიზიიდან განუსაზღვრელი ვადით მიბრძანებულ ქვეყანაში ამ კონკურსის ანალოგის შექმნა სურთ. ინიციატივის მიხედვით, კონკურსში მონაწილეობა მხოლოდ "მეგობრულმა სახელმწიფოებმა" უნდა მიიღონ, სიმღერები კი მარტო რუსულად შეიძლება შესრულდეს.