საზოგადოებრივი მაუწყებლის პირველ არხზე გადაცემა აკუსტიკას ახალი სეზონიდან ახალი წამყვანები ეყოლება. ინფორმაციას ამის შესახებ მუსიკოსი მებო ნუცუბიძე ავრცელებს, რომელიც ბოლო სეზონამდე პროექტის თანაწამყვანი იყო მაკო მჭედლიშვილთან ერთად.

"9 ივნისს მაკომ და მე მაყურებელს მადლობა გადავუხადეთ, მომავალ სეზონამდე დავემშვიდობეთ და დავპირდით, რომ კიდევ უფრო მეტი სიახლითა და საინტერესო ამბებით დავუბრუნდებოდით", — წერს ნუცუბიძე, — "სამწუხაროდ, ვერც მაკო და ვერც მე პირველი არხის ეთერში ამ დანაპირებს ვეღარ შევასრულებთ. გუშინ ჩვენთვის აბსოლუტურად მოულოდნელად დასრულდა ჩვენი აკუსტიკური მოგზაურობა. ასე გადაწყდა: ახალი სეზონიდან გადაცემას ახალი წამყვანები ეყოლება".

მუსიკოსის თქმით, "დანაპირებს მაინც შეასრულებენ" და მალე სხვა პლატფორმაზე სხვა სახელით დაბრუნდებიან.

აღსანიშნავია, რომ მებო ნუცუბიძე შარშანაც და წელსაც აქტიურად აპროტესტებდა რუსულ კანონს, რომელიც ხელისუფლებამ ივნისის თვეში მიიღო მასშტაბური საპროტესტო აქციებისა და საერთაშორისო კრიტიკის ფონზე.

• რა საფრთხეები შექმნა აგენტების კანონმა რუსეთში და რას უნდა ველოდოთ ჩვენ, საქართველოში რუსული კანონის ამოქმედების შედეგად — ინფოგრაფიკა

"ყველას, ვინც დღეს რუსულ კანონს აპროტესტებს, მხოლოდ ერთი სურს: საქართველო იყოს თავისუფალი და დამოუკიდებელი ქვეყანა, სადაც ყველას ექნება თანაბარი შესაძლებლობები და, რაც მთავარია, არჩევანი — იყოს ის, ვინც უნდა და აკეთოს ის, რაც უნდა", — წერდა მებო ნუცუბიძე მაისში.

ცნობისთვის, საზოგადოებრივ მაუწყებელზე გასული წლის ბოლოს დაიხურა პოპულარული გადაცემა გორგილაძის აუტანელი სიმსუბუქე, რომლის ავტორი და წამყვანი, დათო გორგილაძე, ასევე ღიად აკრიტიკებდა რუსულ კანონს. გადაცემის არხზე დასაბრუნებლად მაშინ პეტიციაც შეიქმნა. თუმცა, მოგვიანებით, გორგილაძის აუტანელი სიმსუბუქე იუთუბზე დამოუკიდებელ პროექტად დაბრუნდა.

სხვა გადაცემებთან ერთად, შარშან დაიხურა ასევე იუმორისტული შოუ კაცები, რომლის წამყვანებიც აგრეთვე აპროტესტებდნენ რუსულ კანონს. საზმაუმ გადაცემების დახურვის გადაწყვეტილება მაშინ მაუწყებლობის შესახებ კანონში შეტანილი ცვლილებებით ახსნა, რომლის მიხედვითაც შეიცვალა მაუწყებლის დაფინანსების მოდელი და წესი, ამასთან, არხმა შეიცვალა შენობაც. ეს არგუმენტი მაყურებელთა ნაწილისთვის არადამაჯერებელი აღმოჩნდა, თუმცა, საზმაუმ განაცხადა, რომ "კატეგორიულად მიუღებელია რომელიმე გადაცემის ირგვლივ საკითხის პოლიტიზება".