ლეგენდარული კანადელი მომღერალი სელინ დიონი ხანგრძლივი პაუზის შემდეგ სცენას დაუბრუნდა. გავრცელებული ხმები დღეს საბოლოოდ დადასტურდა — მუსიკოსმა პარიზის ოლიმპიური თამაშების გახსნაზე იმღერა.

ოლიმპიური ცეცხლის ანთების შემდეგ, ეიფელის კოშკზე ბრჭყვიალა თეთრ კაბაში გამოწყობილი სელინ დიონი გამოჩნდა და ედიფ პიაფის Hymne A L'Amour იმღერა. წვიმიან პარიზში როიალის თანხლებით შესრულებული პერფორმანსი, რომელმაც ოლიმპიადის გახსნის ცერემონია დახურა, განსაკუთრებით ემოციური აღმოჩნდა.

ეს 2020 წლის შემდეგ პირველი შემთხვევაა, როცა სელინ დიონი სცენაზე დადგა. კონცერტების რამდენჯერმე გადადების შემდეგ, მუსიკოსმა 2022 წლის მიწურულს განაცხადა, რომ გაშეშებული ადამიანის სინდრომი (Stiff Person Syndrome) დაუდგინდა. ეს იშვიათი ნევროლოგიური დაავადება, რომელიც მილიონში ერთ ადამიანს ემართება, თანდათან პროგრესირებს და იწვევს ტკივილს, კრუნჩხვებს და კუნთოვან გაშეშებას. ამ დაავადებასთან ერთად ცხოვრების რთული მომენტები ვიხილეთ სელინზე გადაღებულ ბიოგრაფიულ ფილმში I Am: Celine Dion, რომელიც ივნისში გამოვიდა.

"ხოხვაც რომ მომიწიოს, სცენას მაინც დავუბრუნდები; ხელებით ლაპარაკიც რომ დამჭირდეს, მაინც. ამას ვიზამ", — განაცხადა სელინმა რამდენიმე კვირის წინ და ეს დაპირება შეასრულა კიდეც პარიზში.

56 წლის სელინ დიონი თანამედროვეობის ერთ-ერთ საუკეთესო ვოკალისტად მიიჩნევა. მუსიკოსის კარიერა 1980-იან წლებში დაიწყო, საყოველთაო აღიარება კი მან 1988 წელს მოიპოვა, როცა შვეიცარია წარადგინა ევროვიზიაზე და გაიმარჯვა. დიონი ერთ-ერთი ყველაზე პოპულარული მომღერალიცაა — მსოფლიოში მისი ჩანაწერების 200 მილიონზე მეტი ეგზემპლარია გაყიდული. ამასთან, ჩანაწერების გაყიდვის მაჩვენებლით, იგი ყველა დროის ყველაზე პოპულარულ კანადელ და ფრანგულენოვან შემსრულებლადაც მიიჩნევა.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...