მთავარი არხის ჟურნალისტის და ოპერატორის მიმართ განხორციელებული დევნის და ძალადობის ფაქტზე ორი პირი დააკავეს.

ინფორმაციას სპეციალური საგამოძიებო სამსახურის ავრცელებს.

მათი ინფორმაციით, გუშინ, 25 ივლისს, დილის საათებში ტელეკომპანია მთავარი არხის ჟურნალისტი ვლადიმერ მენაბდე და ოპერატორი მანუჩარ მჟავანაძე ლანჩხუთის მუნიციპალიტეტ სოფელ სუფსაში, ჟურნალისტურ საქმიანობას ახორციელებდნენ.

რეპორტაჟზე მუშაობის დროს, ერთ-ერთმა ბრალდებულმამათ მიაყენა სიტყვიერი და ფიზიკური შეურაცხყოფა.

ამავე დროს, ჟურნალისტს ფიზიკური შეურაცხყოფა მიაყენა ბრალდებულის ძმამაც, რომელმაც რამდენჯერმე დაარტყა მუშტი თავისა და სახის არეში.

მენაბდემ მიიღო დაზიანება ტუჩის არეში.

ასევე, დაკავებულებმა დააზიანეს ვიდეო კამერა და სიტყვიერი შეურაცხყოფა მიაყენეს ჟურნალისტსა და ოპერატორს.

ორივე პირის სისხლის სამართლის კოდექსის 156-ე მუხლის მე-2 ნაწილის „ა“ ქვეპუნქტით გათვალისწინებული დანაშაულისთვის დააკავეს, რაც გულისხმობს ადამიანის დევნას მის პროფესიულ მოღვაწეობასთან დაკავშირებით.

მათ 3 წლამდე თავისუფლების აღკვეთა ემუქრებათ.