რუსული კანონის საწინააღმდეგო აქციაზე დაკავებული 20 წლის ფრიდონ ბუბუტეიშვილი მოსამართლე ზვიად შავაძემ პატიმრობაში დატოვა.

ადვოკატი 3000-ლარიანი გირაოს სანაცვლოდ ითხოვდა მის გათავისუფლებას.

ბუბუტეიშვილს ბრალი 2 მუხლით აქვს წარდგენილი — სხვისი ნივთის დაზიანება ან განადგურება, რამაც მნიშვნელოვანი ზიანი გამოიწვია (ითვალისწინებს ერთიდან ხუთ წლამდე პატიმრობას),

და — 353-ე პრიმა — თავდასხმა ხელისუფლების წარმომადგენელზე (ითვალისწინებს ოთხიდან შვიდ წლამდე პატიმრობას).

სახელმწიფო ბრალდება ამბობს, რომ აქციაზე ბიჭმა ქვა ესროლა საგანგებო სიტუაციების მართვის სამსახურის თანამშრომელს, რის შედეგადაც მან დაზიანება მიიღო.

"ბრალდების მხარის პოზიცია არის, რომ აღნიშნულ ადამიანს რომ ხელი დაულურჯდა, თურმე, 7 წლამდე პატიმრობა ეკუთვნის აღნიშნულ ადამიანს [ბუბუტეიშვილს]. არ არსებობს ამ საქმეში მტკიცებულებები", — თქვა ადვოკატმა ლაშა ტყეშელაძემ.

ფრიდონ ბუბუტეიშვილი 9 მაისს დააკავეს.