პიქსარის სენსაციური ანიმაციის, Inside Out-ის მეორე ნაწილი მალე რეკორდს მოხსნის და მსოფლიოს ყველაზე მაღალშემოსავლიანი ანიმაციური ფილმი გახდება. Inside Out 2-ის დიდ ეკრანებზე გამოსვლიდან უკვე 6 კვირა გავიდა, თუმცა ხალხი მის ყურებას არ წყვეტს.

ამერიკის შეერთებული შტატების ფარგლებში მულტფილმის შემოსავალი უკვე $596 მილიონს ითვლის — აქედან $12 მილიონი მულტფილმმა მხოლოდ ამ შაბათ-კვირას გამოიმუშავა. საერთაშორისო მასშტაბით Inside Out 2-მა უკვე $845 მილიონი დააგროვა. ამ ეტაპზე მულტფილმის შემოსავალი ჯამში $1.44 მილიარდს ითვლის, რაც $8 მილიონით ჩამორჩება Frozen 2-ის მიერ დამყარებულ რეკორდს.

თვენახევრის განმავლობაში Inside Out 2-მა შეძლო, რომ ყველა დროის ყველაზე მაღალშემოსავლიანი ფილმების ტოპ 15-ეულში მოხვედრილიყო. ანიმაცია რაილის, პატარა გოგოს ტვინში მიმდინარე მოვლენებზე გვიამბობს, რომელსაც რამდენიმე ემოცია — სიხარული, სევდა, ზიზღი, შიში და ბრაზი წარმართავენ.

ფოტო: Pixar