კეპლერის კოსმოსური ტელესკოპი ნასას პირველი მისიაა, რომელსაც სხვა ვარსკვლავების გარშემო მბრუნავი დედამიწის მსგავსი პლანეტების დაფიქსირება შეუძლია.

ორშაბათს, 2017 წლის 19 ივნისს, ნასას ეიმსის კვლევით ცენტრში, უკანასკნელი შედეგების შესახებ სალაპარაკოდ, სხვადასხვა ქვეყნის მრავალი მეცნიერი შეიკრიბა. ახალი მონაცემები 200-ზე მეტ ახალ პლანეტას მოიცავს.

პლანეტობის 219 ახალი კანდიდატი

ყველა ეს პლანეტა ჩვენს ირმის ნახტომში, გედის თანავარსკვლავედის მიმართულებით აღმოაჩინეს.

ფოტო: NASA

2009 წლიდან 2013-მდე, კეპლერმა, ამ რეგიონში, 200 ათასზე მეტი ვარსკვლავი მოძებნა, რომელთა გარშემო, წესით, პლანეტები უნდა იყვნენ. პლანეტობის 219 ახალი კანდიდატი ნაწილია პლანეტობის იმ 4 000 კანდიდატისა და 23 ათასი დადასტურებული პლანეტისა, რომლებიც კეპლერმა ამ დრომდე აღმოაჩინა.

ამ პლანეტებიდან ათი, ჩვენი დედამიწის მსგავსია

პლანეტობის 219 ახალი კანდიდატიდან, ათი, სავარაუდოდ, კლდოვანი პლანეტაა და თავიანთი დედავარსკვლავის გარშემო სასიცოცხლო ზონაში ბრუნავენ - მანძილი ვარსკვლავიდან, სადაც თხევად წყალს არსებობის საშუალება აქვს.

პატარა პლანეტები ორი ზომისაა

დიდმა კეპლერმა თვალები აგვიხილა და მრავალი პატარა პლანეტა დაგვანახა. ამ პლანეტების უმეტესობა ან დედამიწაზე 1,5-ჯერ დიდია, ან ნეპტუნზე ოდნავ - პატარა. სუპერ-დედამიწები და მინი ნეპტუნები.

ზოგიერთი მათგანი შეიძლება სიცოცხლისათვის ხელსაყრელი იყოს

ჩვენთვის ნაცნობი სიცოცხლისთვის წყალი უმთავრესი ინგრედიენტია. ახალაღმოჩენილთაგან მრავალ პლანეტას, სავარაუდოდ, პატარა კლდოვანი ბირთვი აქვს, რომელსაც გარს აკრავს ჰელიუმისა და წყალბადის სქელი ატმოსფერო, ზოგზე ფიქრობენ, რომ მთლიანად ოკეანითაა დაფარული. ეს არ ნიშნავს, რომ ამ პლანეტების ოკეანეები სავსეა წყლით, მაგრამ ვიოცნებოთ, ჩვენი რა მიდის?

ახალ პლანეტებზე ნადირობა გრძელდება

კეპლერი პლანეტებზე ნადირობას კოსმოსის სხვადასხვა რეგიონებში აგრძელებს. ნასას TESS (Transiting Exoplanet Survey Satellite)-ისა და ჯეიმს ვების კოსმოსური ტელესკოპის გაშვებით, მეცნიერები აპირებენ მზესთან მდებარე უახლოესი პლანეტები მოძებნონ და განსაზღვრონ მათი ატმოსფეროების შედგენილობა. ნასას განცხადებით, 2020-იანების შუაში, ისინი გეგმავენ, დედამიწის მსგავს პატარა პლანეტებს Wide-Field Infrared Survey Telescope (WFIRST)-ით ფოტო პირდაპირ გადაუღონ.