ტელეკომპანიის განცხადების შემდეგ, ოპერატორები აღნიშნავენ, რომ ისინი მუდმივად კონსტრუქციულად მოქმედებდნენ.

რატომ არის მნიშვნელოვანი: ფორმულას ოპერატორებმა 31 იანვარს ხელფასის გაზრდის მოთხოვნით სამსახურებრივი მოვალეობის შესრულებაზე უარი თქვეს და გაიფიცნენ. გუშინ, 3 თებერვალს ტელეკომპანიამ ისინი სამსახურიდან გაათავისუფლა.

• ფორმულას განცხადებით, ოპერატორებმა არ დაიცვეს გაფიცვის გამოცხადების კანონით დადგენილი ვადები და წესი და 3 დღის განმავლობაში უხეშად დაარღვიეს ხელშეკრულებით გათვალისწინებული ვალდებულებები.
• მათივე თქმით, 1-ლი თებერვლიდან 3 თებერვლის ჩათვლით, ადმინისტრაციას ჰქონდა მოლაპარაკების არაერთი მცდელობა.

დეტალები: ოპერატორების განცხადებით, ხელფასის მომატების მოთხოვნის გაჟღერებისთანავე, მათი მოქმედებები იყო კონსტრუქციული და მოლაპარაკებებზე ორიენტირებული.

• "ამას ადასტურებს ისიც, რომ ამ დრომდე ვცდილობდით პროცესი დარჩენილიყო ორგანიზაციის შიგნით და არ გამოგვეტანა საჯაროდ, რათა დაგვეტოვებინა კომპანიასთან შეთანხმების სივრცე და კრიტიკული მედიისთვის, რომლის არსებობა ჩვენს ქვეყანაში მნიშვნელოვნად მიგვაჩნია, არ მიგვეყენებინა რეპუტაციული ზიანი";
• "სამწუხაროდ, ტელეკომპანია ღია არ აღმოჩნდა ჩვენი მოთხოვნების განხილვისთვის და მენეჯმენტმა პირველივე კომუნიკაციაში ამ თემაზე შეურაცხყოფა მოგვაყენა";
• "მენეჯმენტმა სრულად უარყო ჩვენი მოთხოვნების შესრულების შესაძლებლობა და მალევე, როგორც კი ეს პროცესი საჯარო გახდა, დაიწყო "გარე ძალების" ჩართულობაზე საუბარი, რაც ჩვენთვის უკიდურესად შეურაცხმყოფელი და ღირსების შემლახველია", — აღნიშნულია მათ განცხადებაში.

გარდა ამისა, ოპერატორები ამბობენ, რომ პროფესიის პატივისცემისა და ქვეყანაში კრიტიკული მედიის მნიშვნელობის გათვალისწინებით, მზად არიან წარმოშობილი სიტუაცია კვლავ მოლაპარაკებების რეჟიმში დააბრუნონ.

• "თუ ეს კომუნიკაცია და დიალოგი ჩვენი ღირსების პატივისცემით წარიმართება და შრომითი და სოციალური საკითხების საქმიან და სამართლიან გარემოში განხილვის შესაძლებლობას მოგვცემს", — ვკითხულობთ განცხადებაში.

ტელეკომპანია ფორმულა დატოვეს ჟურნალისტებმა ქეთი ხიდიშელმა და მარტა ქურასბედიანმა.

• ორივე ჟურნალისტის ქმარი გაფიცულებს შორის იყო, თუმცა ქურასბედიანმა და ხიდიშელმა ტელეკომპანია მათ დათხოვნამდე, პროტესტის პირველ დღეს, პირველ თებერვალს დატოვეს.