ლეგენდარულ ამერიკელ მსახიობ ჯეიმს დინზე ბიოგრაფიულ ფილმს იღებენ. ჰოლივუდის "ოქროს ხანის" ვარსკვლავის ისტორიას კინოეკრანზე რეჟისორი გაი გვიდო გააცოცხლებს. ფილმში მთავარ როლს ბრენდონ ფლინი ითამაშებს, რომელსაც მაყურებლები პოპულარული სერიალებიდან True Detective და 13 Reasons Why იცნობენ.

გვიდოს ნამუშევარი უილიამ ბასტის 2006 წელს გამოქვეყნებულ ავტობიოგრაფიულ წიგნს, როგორ გადავურჩი ჯეიმს დინს, ეფუძნება. ბასტი, რომელიც სცენარისტი იყო, მემუარებში თავისი და ჯეიმს დინის რომანტიკულ ურთიერთობაზე ჰყვება. ავტორი იგონებს, როგორ შეხვდა ახალგაზრდა მსახიობს კალიფორნიის უნივერსიტეტში 19 წლის ასაკში, რის შემდეგაც ისინი ჯერ ახლო მეგობრები და ოთახის მეზობლები გახდნენ, მოგვიანებით კი — რომანტიკული პარტნიორებიც. ბასტის მტკიცებით, თავიანთ ურთიერთობას საიდუმლოდ ინახავდნენ, რათა იმ პერიოდში ჰოლივუდის ამომავალ ვარსკვლავად ქცეული დინის კარიერა არ დაზიანებულიყო. თუმცა, ავტორი ასევე ჰყვება, რომ მაშინ დინს ურთიერთობა ჰქონდა მსახიობ ქალებთან, თავად კი ყოველთვის ელოდებოდა, რომ ის და ჯეიმსი მალე ერთად იცხოვრებდნენ. თუმცა, 1955 წელს, სულ რაღაც 24 წლის ასაკში, ჯეიმს დინი ავტოსაგზაო შემთხვევას ემსხვერპლა.

როგორც ცნობილია, ბიოგრაფიული ფილმის სცენარი, რომლის ავტორიც თავად გვიდოა, ბასტისა და დინის პირველი შეხვედრიდან მსახიობის სიკვდილამდე პერიოდს ასახავს.

"ეს ჩვეულებრივი ბიოგრაფია როდია", — აღნიშნავს გვიდო, რომელიც ბასტს 2011 წელს თავადაც შეხვდა — "ეს ძალიან ფაქიზი, ტრაგიკული ამბავია ორ ახალგაზრდა კაცზე, რომლებიც ერთმანეთს მაშინ შეხვდნენ, როცა ღიად ცხოვრებას მძიმე საფასური ჰქონდა. ბრენდონ ფლინს აქვს ის ქარიზმაც და დაუცველობის განცდაც, რომელიც ამ როლს სჭირდება. ჯეიმს დინის კომპლექსური პერსონის გასაცოცხლებლად უკეთეს კანდიდატურას ვერც წარმოვიდგენდი.

"ჯეიმს დინის პერსონა ცნობილი უცნობია. ვცდილობთ, გამოვიკვლიოთ მისი ხანმოკლე ცხოვრება, რომელმაც სამად სამი ფილმი, უამრავი ფოტო და ლეგენდებად ქცეული ამბები დაიტია. გვინდა, გავიგოთ, ვინ იყო იგი სინამდვილეში — არა როგორც ხატი, არამედ როგორც ადამიანი".

სცენარით კმაყოფილია თავად ფლინიც, რომელიც რეჟისორს დინის "გაადამიანურების" და სენსაციურობაზე უარის თქმის გამო აქებს.

"ეს ამბავი ასახავს ისტორიულ სინამდვილეს, როგორ აიძულებდნენ ჰოლივუდში ლგბტქ ადამიანებს, პირად ცხოვრებაშიც კი როლი ეთამაშათ", — ამბობს ფლინი.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...