"მგონია, რომ [ეს გადაწყვეტილება] რუსეთის დაკვეთაა. გავიხსენოთ, ამაფეთქეს რუსებმა... მაქვს უფლება რომ მეგონოს" — ამის შესახებ ოპოზიციონერმა პოლიტიკოსმა გივი თარგამაძემ მედიის წარმომადგენლებს განუცხადა. მას ხელზე ბორკილები უკვე დაადეს.

"გავიმარჯვებთ აუცილებლად" — აღნიშნა მან.

"გავიმარჯვებთ აუცილებლად და ეს იქნება, ჩემი აზრით, უფრო მალე, ვიდრე მეგონა მეც აქამდე. […]

[რუსეთიდან საგამოძიებო სტრუქტურების შემოშვების სურვილი] მაგის სურვილი ჰქონდა თავის დროზე სოზარ სუბარს. ის ამბობდა, რომ, სამწუხაროდ, ვერ გადავცემთ [გივი თარგამაძეს რუს სამართალდამცველებს] იმიტომ, რომ საკონსტიტუციო ჩანაწერი არსებობს, რომელიც უკრძალავს საქართველოს სხვა ქვეყნისთვის ადამიანის გადაცემას, მაგრამ იქნებ შემოვუშვათ რუსეთის საგამოძიებო კომიტეტის ჯგუფი და აქ დაჰკითხონონ.

მგონია, რომ რუსეთის დაკვეთაა. გავიხსენოთ, ამაფეთქეს რუსებმა… მაქვს უფლება, რომ მეგონოს", — განაცხადა გივი თარგამაძემ.

ოპოზიციონერ პოლიტიკოსს გივი თარგამაძეს ოცნების პარლამენტის დროებითი საგამოძიებო კომისიაზე გამოუცხადებლობისთვის მოსამართლე ნინო გალუსტაშვილმა 7 თვით პატიმრობა მიუსაჯა. მას აეკრძალა 2 წლის ვადით თანამდებობის დაკავებაც. სხდომას თავად გივი თარგამაძე არ ესწრებოდა. პოლიტიკოსს 10 000-ლარიანი გირაო ჰქონდა შეფარდებული, რაც მან კანონით დადგენილ ვადაში გადაიხადა.

შეგახსენებთ, წულუკიანის კომისიაზე გამოუცხადებლობისთვის მოსამართლე ნინო გალუსტაშვილმა 7-თვიანი პატიმრობა შეუფარდა სტრატეგია აღმაშენებლის ლიდერს, გიორგი ვაშაძესაც. მას აღკვეთის ღონისძიების სახით 50 000-ლარიანი გირაო ჰქონდა შეფარდებული, რაც მან კანონით დადგენილ ვადაში გადაიხადა. ამავე კომისიაზე გამოუცხადებლობისთვის კოალიცია ცვლილებისთვის ლიდერს ზურაბ გირჩი ჯაფარიძეს 7 თვით, ხოლო კოალიცია ლელო — ძლიერი საქართველოს ლიდერებს მამუკა ხაზარაძესა და ბადრი ჯაფარიძეს 8-8 თვით პატიმრობა შეეფარდათ. ასევე, წულუკიანის კომისიაზე გამოუცხადებლობისთვის ციხეში არიან კოალიცია ცვლილებისთვის ლიდერები — ნიკა გვარამია, ნიკა მელია და ციხეშია ირაკლი ოქრუაშვილიც, რომელსაც სხვა ბრალთან ერთად ამ საქმეზეც გამოუტანენ განაჩენს.