ცხოველთა დაცვის აქტივისტი და იუთუბის ვარსკვლავი, 29 წლის მიკეილა რეინსი სუიციდის შედეგად გარდაიცვალა. ინფორმაციას მისი მეუღლე, ეთან რეინსი იუთუბის ემოციურ ვიდეოში ავრცელებს:

ეთანის თქმით, მიკეილა წლების მანძილზე მენტალური ჯანმრთელობის მრავალი პრობლემით იტანჯებოდა — მას ონლაინ კრიტიკასთან გამკლავება უჭირდა.

"ვეღარ შეძლო საკუთარი გრძნობების ატანა და სიცოცხლე დაასრულა", ამბობს ის. "გული მიკვდება, რომ ასეთი უანგარო ადამიანი, რომელმაც საკუთარი ცხოვრება ცხოველებს მიუძღვნა, ამდენი ნეგატივის მსხვერპლი იყო", — ამბობს ეთანი.

და თქვენ, ვინც მიკეილას ამისკენ უბიძგეთ, ყველა თქვენგანი პასუხისმგებელია, რომ მას თავი ასე აგრძნობინეთ. მინდა, რომ თქვენც იგრძნოთ ის ყველაფერი, რასაც მიკეილა გრძნობდა. მინდა თქვენც იგრძნოთ ის, რასაც მე ვგრძნობ

მიკეილა რეინსმა 2017 წელს, 20 წლის ასაკში შექმნა ცხოველთა გადარჩენის არაკომერციული ორგანიზაცია — SaveAFox Rescue. ის მიზნად ისახავდა ბეწვის ფერმებისგან მელიების გადარჩენას და, როგორც ორგანიზაციის ვებსაიტზე ვკითხულობთ, მან დღემდე 150 მელია გადაარჩინა.

მას შემდეგ სოციალურ მედიაში მიკეილას ბევრი მხარდამჭერი გამოუჩნდა, მათ შორის 2.4 მილიონი გამომწერი იუთუბზე და ასობით ათასი სხვა სოციალურ პლატფორმებზე.

ეთან რეინსი ყვება, რომ სანამ სასწრაფო დახმარება მივიდოდა, მეუღლეს 15 წუთის განმავლობაში თვითონ უტარებდა პირველად დახმარებას.

გამოქვეყნებულ ვიდეოში იგი ხალხს მოუწოდებს, რომ თუ თავს დაკარგულად და უიმედოდ იგრძნობენ, დაუკავშირდნენ მეგობრებს, ოჯახის წევრებს ან კრიზისის ცხელ ხაზებს. ხოლო მათ, ვისი საყვარელი ადამიანებიც გასაჭირში არიან, ურჩია, რომ სანამ გვიანი არ იქნება, რაიმე თქვან ან გააკეთონ ახლობლების დასახმარებლად.

"მიუხედავად იმისა, რომ ეს ჩემი ცხოვრების უდიდესი დანაკარგია და თავს ისე ვგრძნობ, თითქოს გულში სიცარიელე მაქვს, მიკაილას სინათლის ჩაქრობას არ დავუშვებ, ნეგატივს გამარჯვების უფლებას არ მივცემ და მიკაილას მისიას გავაგრძელებ."

ეთანი მეუღლის საქმიანობის — ცხოველების გადარჩენის გაგრძელებას აპირებს: "მანამ, სანამ თქვენ მხარს დაგვიჭერთ, ჩვენ წინსვლას განვაგრძობთ. დარწმუნებული ვარ, ამ სამყაროში მეტი სინათლის შემოტანა შეგვიძლია და ამას მიკაილასთვის გავაკეთებთ."

მიკაილა რეინსს პატარა ქალიშვილი — ფრეია — დარჩა, რომელიც ხშირად ჩანდა დედის სოციალურ ქსელებში.

ფოტო: saveafox_rescue

ფოტო: saveafox_rescue