"მზად ვართ, რომ მაია მწარიაშვილის პოზიცია მოვისმინოთ და მას მივცეთ საშუალება, გასცეს პასუხი იმ ბრალდებებს, რაზეც მას სურს, თუმცა მოთხოვნა — რა ფორმით, რომელ ეთერში, რა გადაცემაში და რამდენი დრო უნდა დავუთმოთ სტუმარს, ამაზე გადაწყვეტილებას იღებს კერძო ტელეკომპანია რუსთავი 2, — ამის შესახებ რუსთავი 2-ის საინფორმაციო სამსახურის ხელმძღვანელმა და გადაცემა ღამის კურიერის წამყვანმა, ნინო შუბლაძემ 25 ივნისს ღამის კურიერის ეთერში განაცხადა.

შეგახსენებთ, რომ გუშინ, 25 ივნისს მედიის წარმომადგენლებმა აქცია გამართეს რუსთავი 2-ის ოფისთან. ორგანიზატორები ითხოვენ, რომ მზია ამაღლობელის ადვოკატს შესაძლებლობა მიეცეს, გადაცემა "ღამის კურიერში" უპასუხოს ქართული ოცნების პრემიერმინისტრის, ირაკლი კობახიძის იმ განცხადებას, რომლითაც მან მზია ამაღლობელის მიმართ განზრახ მცდარი ინფორმაცია გაავრცელა და მისი უდანაშაულობის პრეზუმფცია დაარღვია.

ნინო შუბლაძის თქმით, "მსგავსი მოთხოვნები ემსგავსება სარედაქციო პოლიტიკაზე ზეწოლის მცდელობას".

"შემიძლია გითხრათ, რომ მაია მწარიაშვილს რუსთავი 2-მა და "კურიერმა" შესთავაზა ინტერვიუს ჩაწერა და პოზიციის გამოხატვა, რაზეც უარი მივიღეთ. მოთხოვნა არის აუცილებლად პირდაპირი ეთერი. აქვე, როგორც რუსთავი 2-ის საინფორმაციო სამსახურის ხელმძღვანელმა, სრული პასუხისმგებლობით შემიძლია გითხრათ, რომ არასდროს პრობლემას არ წარმოადგენს მზია ამაღლობელის პროცესების გაშუქება ჩვენს არხზე, მისი მხარდამჭერების პოზიციების გაშუქება. ახლაც მზად ვართ, რომ მაია მწარიაშვილის პოზიცია მოვისმინოთ და მას მივცეთ საშუალება, გასცეს პასუხი იმ ბრალდებებს, რაზეც მას სურს, თუმცა მოთხოვნა - რა ფორმით, რომელ ეთერში, რა გადაცემაში და რამდენი დრო უნდა დავუთმოთ სტუმარს, ამაზე გადაწყვეტილებას იღებს კერძო ტელეკომპანია რუსთავი 2 და მსგავსი მოთხოვნები ემსგავსება სარედაქციო პოლიტიკაზე ზეწოლის მცდელობას. მიუხედავად ამისა, კიდევ ერთხელ ვიმეორებ, რომ არასოდეს პრობლემას არ წარმოადგენს ამ პროცესების, არც პატიმრის მხარდამჭერების განცხადებების გაშუქება", — განაცხადა ნინო შუბლაძემ.