მოსამართლე ნინო გალუსტაშვილმა 11 სინდისის პატიმრის — ანდრო ჭიჭინაძის, ონისე ცხადაძის, ჯანო არჩაიას, რუსლან სივაკოვის, ლუკა ჯაბუას, გურამ მირცხულავას, ვალერი თეთრაშვილის, გიორგი ტერიშვილის, ირაკლი ქერაშვილის, რევაზ კიკნაძისა და სერგეი კუხარჩუკის შუამდგომლობა სახაზინო ადვოკატების — ირაკლი ბენიას, სალომე არდოტელის და
დალი თუშიშვილის აცილებასთან დაკავშირებით არ დააკმაყოფილა.

"რაც შეეხება თვითაცილებას, სასამართლო არ დააკმაყოფილებს. თქვენ ისევე განაგრძობთ ამ საქმეში მონაწილეობას, როგორც შეთანხმებით აყვანილი ადვოკატები, შესაბამისად სასამართლომ როცა იმსჯელა საზოგადოებრივი ადვოკატის დანიშვნაზე, ამ საფუძვლით თვლის, რომ აცილების საფუძველი არ არსებობს, საქმეს განვაგრძობთ საზოგადოებრივი ადვოკატების მონაწილეობით და ამ საკითხს აღარ დავუბრუნდებით", — განაცხადა გალუსტაშვილმა.

შეგახსენებთ, რომ წინა სასამართლო პროცესზე, 24 ივნისს, მოსამართლე ნინო გალუსტაშვილმა 11-ვე პირს სახაზინო ადვოკატი დაუნიშნა. ამის მიზეზი ის გახდა, რომ 24 ივნისის პროცესზე არ იმყოფებდა ირაკლი ქერაშვილის ადვოკატი რეზო აჭარაძე. ქერაშვილმა სხდომის დატოვება ითხოვა. ამ მიზეზის გამო მოსამართლე გალუსტაშვილმა ყველა სინდისის პატიმარს საზოგადოებრივი ადვოკატი დაუნიშნა, რომელსაც 1 დღე მიეცა 16-ტომიანი საქმის გასაცნობად.

გალუსტაშვილის განცხადებას სინდისის პატიმრების და მათი ადვოკატების უკმაყოფილება მოჰყვა. მათი თქმით, ამ გადაწყვეტილებით სასამართლო უპატივცემულობას გამოხატავდა იმ იურისტების მიმართ, რომლებიც ყოველდღიურად იმყოფებიან სასამართლო სხდომათა დარბაზში და იცავენ მათი დაცვის ქვეშ მყოფებს.

დღეს, 26 ივნისს გამართულ სხდომაზე, სამივე სახაზინო ადვოკატმა საქმის აცილება მოითხოვა. სახაზინო ადვოკატმა ირაკლი ბენიამ განაცხადა, მისმა დასაცავმა პირებმა — რევაზ კიკნაძემ, ვალერი თეთრაშვილმა, ონისე ცხადაძემ და რუსლან სივაკოვმა უნდობლობა გამოუცხადეს და მას პენიტენციურ დაწესებულებაში არ შეხვდნენ.

"რევაზ კიკნაძესთან და ონისე ცხადაძესთან ჩემი კომუნიკაციაც არ შედგა, საკნიდან არ ამოვიდნენ, რაც შეეხება ვალერი თეთრაშვილს და რუსლან სივაკოვს, ისინი ამოვიდნენ, მაგრამ როცა გაიგეს, რომ მე ახლად დანიშნული ადვოკატი ვიყავი, შეხვედრის ადგილი დატოვეს. ჩემი კომუნიკაცია ორ ადამიანთან არ შედგა...

დაკავებულებს ვეთანხმები, მინიმუმ ბრალდებულებთან კომუნიკაციაც არ შედგა, ორი მათგანი საერთოდ ნდობასაც არ მიცხადებს, შეხვედრის ოთახშიც არ ამოვიდა, ფიზიკურადაც არ ამოვიდნენ. აქ ნათელია ყველაფერი, რა თქმა უნდა, ვეთანხმები ბრალდებულებს და ვითხოვ ჩამოცილებას", — განაცხადა ბენიამ.