ანა ვინტური ამერიკული Vogue-ის მთავარი რედაქტორის თანამდებობას 37 წლის შემდეგ ტოვებს. ინფორმაციას საერთაშორისო პრესა ადასტურებს.

ვინტურმა ხუთშაბათს თანამშრომლებს აცნობა, რომ Vogue ახალი სარედაქციო ხელმძღვანელის ძიებას იწყებს. ამავდროულად, ვინტური დარჩება ჟურნალის მფლობელი კონგლომერატის, Condé Nast-ის კონტენტის ოფიცრისა და Vogue-ის გლობალური სარედაქციო დირექტორის პოზიციებზე.

ლეგენდარული რედაქტორი Vogue-ს 1988 წლიდან ხელმძღვანელობს, მას შემდეგ, რაც მან შეცვალა ყოფილი მთავარი რედაქტორი, გრეის მირაბელა.

გავრცელებული ინფორმაციით, ანა ვინტურის შემდეგ Vogue-ს მთავარი რედაქტორი აღარ ეყოლება — ჟურნალში დაინიშნება ადამიანი, რომლის თანამდებობაც კონტენტის ხელმძღვანელი იქნება, რაც იმას ნიშნავს, რომ Vogue-ს ერთპიროვნული მმართველი აღარ ეყოლება.

ფოტო: PA Media

37-წლიანი ბრწყინვალე კარიერის განმავლობაში ანა ვინტურმა მოდის ინდუსტრიის კარი არაერთ ტალანტს გაუღო, მათ შორის, ჯონ გალიანოს, ალექსანდრ მაკქუინს, მარკ ჯეიკობსს, პროენზა სქულერს და ა.შ. მისი ლიდერობით Vogue კულტურის გლობალურ სიმბოლოდ დამკვიდრდა. ვინტურმა გააფართოვა სარედაქციო სტანდარტები და მოდის ჟურნალისტიკაში სიმტკიცის, ინოვაციის, მრავალფეროვნებისა და დახვეწილობის სახედ იქცა. მისი სახელი უკავშირდება Met Gala-ს წლის უმნიშვნელოვანეს მოდის მოვლენად ქცევას.

Condé Nast-ის მთავარი კონტენტის ოფიცრის რანგში, ვინტური მთელ მსოფლიოში კომპანია Condé Nast-ის ყველა ბრენდს კურირებს — მათ შორის Wired, Vanity Fair, GQ, AD, Condé Nast Traveler, Glamour, Bon Appétit, Tatler, The World of Interiors, Allure და სხვა — გარდა The New Yorker-ისა, რომელსაც დევიდ რემნიკი ხელმძღვანელობს.