ტელეკომპანიამ განცხადება დღეს გაავრცელა.

რატომ არის მნიშვნელოვანი: ფორმულას ოპერატორებმა 31 იანვარს ხელფასის გაზრდის მოთხოვნით სამსახურებრივი მოვალეობის შესრულებაზე უარი განაცხადეს და გაფიცვა დაიწყეს. ფორმულაში ამბობენ, რომ ისინი დაუყოვნებლივ 500 ლარით მატებას ითხოვდნენ.

• მათივე განცხადებით, ადმინისტრაციის განმარტების მიუხედავად, რომ ახლა მატება შეუძლებელი იყო, ოპერატორებმა აღარ ისურვეს დიალოგის გაგრძელება.
• თავად ოპერატორები მედიაჩეკერთან აცხადებდნენ, რომ პრობლემის მოგვარების სანაცვლოდ, მენეჯმენტისგან მიიღეს დამამცირებელი დამოკიდებულება და კატეგორიული უარი პირობების გაუმჯობესებაზე, ამიტომ პროტესტის ფორმად გაფიცვა აირჩიეს.
• ფორმულას იურისტი, ეთო ქათამაძე On.ge-სთან ამბობდა, რომ ე.წ. გაფიცვის შესახებ პოსტფაქტუმ გაიგეს, პროტესტი კი იქამდე გაგრძელდა, სანამ კომპანიას თანამშრომლების შენარჩუნების რესურსი აღმოაჩნდა.

დეტალები: ფორმულას განცხადებით, ოპერატორებმა არ დაიცვეს გაფიცვის გამოცხადების კანონით დადგენილი ვადები და წესი და 3 დღის განმავლობაში უხეშად დაარღვიეს ხელშეკრულებით გათვალისწინებული ვალდებულებები.

• მათივე თქმით, 1-ლი თებერვლიდან 3 თებერვლის ჩათვლით, ადმინისტრაციას ჰქონდა მოლაპარაკების არაერთი მცდელობა.
• "ვთხოვდით, დაბრუნებოდნენ თავიანთ სამუშაო გარემოს, შეესრულებინათ კონტრაქტით დაკისრებული მოვალეობები და ვთავაზობდით ალტერნატივებს. განვუმარტეთ, რომ კომპანიას ამ ეტაპზე არ ჰქონდა ხელფასის ყველასთვის ზრდის საშუალება. თუმცა, შევთავაზეთ, რომ მათ უშუალო ხელმძღვანელთან კომუნიკაციით, ინდივიდუალურად ყოფილიყო განხილული ხელფასის სამომავლოდ მატების საკითხი და კრიტერიუმები", — ვკითხულობთ ფორმულას განცხადებაში.
• ოპერატორები კი ამბობდნენ, რომ ტელეკომპანიას შესთავაზეს კომპრომისული ვარიანტი, რაც გულისხმობდა ხელფასის მატების რამდენიმე თვეზე გადანაწილებას, თუმცა კომპანიამ ეს შეთავაზება უპასუხოდ დატოვა.
• ფორმულას განმარტებით, ოპერატორები ულტიმატუმზე იდგნენ — გარდა ამისა, ამბობენ, რომ როცა ცდილობდნენ გამოძებნილი ოპერატორების მცირე რესურსით ემუშავათ, ბოიკოტის რეჟიმში მყოფები პირადად და სხვა ოპერატორების გავლით უკავშირდებოდნენ გადაღებაზე გასულ თანამშრომლებს და აყენებდნენ შეურაცხყოფას.
• ტელეკომპანიამ 25 ოპერატორი გაათავისუფლა: "ვწუხვართ, რომ პროტესტის ფორმები და შერჩეული დრო ძალიან მძიმედ აისახა ფორმულას ყველა თანამშრომელზე. სამწუხაროა, რომ ოპერატორებმა არც კანონით დადგენილი ვადა დაიცვეს და არც კოლეგიალობა".