ქართული ოცნების პარლამენტმა "სიტყვისა და გამოხატვის თავისუფლების შესახებ" კანონში ცვლილებები III მოსმენით, დაჩქარებული წესით მიიღო. კანონპროექტი "ოცნების" დეპუტატებმა 2 დღეში მიიღეს — 84-მა წევრმა მხარი დაუჭირა.

კანონში შეტანილი მრავალი ცვლილებების მიხედვით, კანონზე 100-დღიანი ვადა მოქმედებს, რაც ნიშნავს, რომ მიუხედავად იმისა კანონი დღეს ამოქმედდა, მოსარჩელეს შეუძლია გასული 100 დღის ვადაში "ჩადენილი ცილისწამებისთვის" მეორე პირს პასუხისმგებლობა მოსთხოვოს. შეტანილი ცვლილებებით, გაუქმდა "პროფესიული საიდუმლოების გამხელას" — პირი აღარ აქვს უფლება დაიცვას ინფორმაციის მომწოდებელი წყაროს ვინაობა. ცვლილება ასევე შეეხო:

  • საჯარო სივრცეში შეურაცხყოფის შინაარსობრივ რეგულირებას;
  • თუ ვერ მტკიცდება იყო თუ არა ინფორმაცია ცილისწამება — გადაწყვეტილება სიტყვის თავისუფლების შეზღუდვის უპირატესობით აღარ მიიღება;
  • ცილისწამების დამტკიცების შემთხვევაში პირს ეკისრებოდა ვალდებულება შეესწორებინა გავრცელებული ინფორმაცია ან უარყოფა გაეკეთებინა მოგვიანებით — ცვლილებებით მოპასუხეს ქონებრივი/არაქონებრივი ზიანის ანაზღაურება დაეკისრება;

პლენარულ სხდომაზე თეა წულუკიანმა სისხლის სამართლის კანონმდებლობაში "ცილისწამების" თაობაზე მუხლის შემოტანის ინიციატივაც წამოაყენა. "ოცნების" ვიცესპიკერის განმარტებით, "ვარდების რევოლუციიდან" მალევე, მიხეილ სააკაშვილმა სისხლის სამართლის კანონმდებლობიდან ცილისწამების ცნება გააქრო".

"როცა ჩვენი კომისია მუშაობდა, ბოლო თვეების განმავლობაში, გამოიკვეთა, რომ მას არამხოლოდ იმისთვის სჭირდებოდა, რომ ადამიანები ისეთებად შეერაცხა როგორებადაც ის მიიჩნევდა, არამედ მაგალითისთვის, ყველა ის ადამიანი, ვინც უსასტიკესად მოკლეს, ამ ყოველივეს თან სდევდა ცილისწამება. მაგალითად: სერგო თეთრაძისთვის იმის დაბრალება, რომ ჯაშუშია; პაატა ქარდავასთვის იმის დაბრალება, რომ ქვეყანას უღალატა და სხვასთან ითანამშრომლა; იგივე დათო ცინდელიანისა და სხვების შემთხვევაში. ეს ჩამოყალიბდა მოდელად იმის წყალობით, რომ მან წინსწრებად გააუქმა დამსჯელი ნორმა.

ჩვენ ალბათ მომავალში კარგი იქნება ვიფიქროთ, რომ სისხლის სამართლის მატერიალურ კოდექსში ცილისწამება დამამძიმებელ გარემოებად მაინც იქნეს მიჩნეული," — განაცხადა წულუკიანმა.