უკრაინული მედიის ცნობით, 26 ივნისს, ევროპულმა საბჭომ ბრიუსელში გამართულ შეხვედრაზე ევროკავშირში უკრაინის გაწევრიანების მხარდაჭერის შესახებ განცხადების ერთხმად მიღება ვერ შეძლო, რადგან უნგრეთმა კვლავ არ დაუჭირა მხარი წინადადებას.

მედიის ცნობით, ევროსაბჭოს სამიტის წინა დღეს, უნგრეთის მთავრობამ განაცხადა, რომ ევროკავშირში უკრაინის გაწევრიანების შესახებ ქვეყანაში ჩატარებული რეფერენდუმის მონაწილეთა 95% ამ წინადადების წინააღმდეგი იყო.

ორბანის რეფერენდუმი უკვე გააკრიტიკეს მისი სანდოობისა და მონაწილეობის დაბალი მაჩვენებლის გამო. როგორც უკრაინული მედია წერს, რეფერენდუმმა გააჩინა ეჭვი, რომ ორბანი ამ შედეგების გამოყენებას შეეცდება მომავალშიც ევროკავშირში უკრაინის გაწევრიანებისთვის წინააღმდეგობის გასამართლებლად.

რეფერენდუმში მონაწილეობის მისაღებად უნგრეთის მოქალაქეებმა ფოსტით მიიღეს ბიულეტენი ორბანის წერილთან ერთად, რომელშიც უნგრეთის პრემიერი ხალხს მოუწოდებდა, რომ ხმა უკრაინის გაწევრიანების წინააღმდეგ მიეცათ.

ორბანმა განაცხადა, რომ რეფერენდუმში მან უკრაინის ევროკავშირში გაწევრიანების წინააღმდეგ მისცა ხმა და საჯაროდ გაავრცელა ფოტოები, სადაც ის საარჩევნო ბიულეტენში უთითებს — "წინააღმდეგ". მან წელს განაცხადა, რომ ევროკავშირში კიევის გაწევრიანება უნგრეთს "გაანადგურებდა".

ევროპული საბჭოს განცხადებით, დოკუმენტს 27-დან 26 სახელმწიფო "მტკიცედ უჭერს მხარს". ევროკავშირის ყველა სახელმწიფომ, უნგრეთის გარდა, კიდევ ერთხელ დაადასტურა უკრაინის "თანდაყოლილი უფლება, აირჩიოს საკუთარი ბედი" და მხარდაჭერა ქვეყნის "ევროკავშირში გაწევრიანებისკენ მიმავალ გზაზე".

"ევროსაბჭო აქებს უკრაინას ყველაზე რთულ ვითარებაში გაწევრიანებასთან დაკავშირებული რეფორმების ტემპისთვის, მიესალმება მიღწეულ მნიშვნელოვან პროგრესს და მოუწოდებს უკრაინას და კომისიას, გააძლიერონ მუშაობა გაწევრიანების პროცესში", - ნათქვამია განცხადებაში.

ევროკავშირის წევრი სახელმწიფოები ასევე შეთანხმდნენ, გაითვალისწინონ კომისიის შეფასება, რომ უკრაინა მზადაა გახსნას ფუნდამენტური საკითხების ჯგუფი. თუმცა, ფორმალური მოლაპარაკებები შეიძლება დაიწყოს მხოლოდ 27-ვე წევრი სახელმწიფოს ერთიანი თანხმობით.

ცნობისთვის, უკრაინამ ევროკავშირში გაწევრიანებაზე განაცხადი შეიტანა მას შემდეგ, რაც რუსეთმა 2022 წელს ომი დაიწყო. განაცხადის გაკეთებიდან რამდენიმე თვეში უკრაინას კანდიდატის სტატუსი მიენიჭა.