აშშ-ში, სან-ფრანცისკოში, მდებარე ცნობილი წიგნის მაღაზია The Booksmith ჰარი პოტერის სერიის რომანებს აღარ გაყიდის. მიზეზი წიგნების ავტორის, ჯოან როულინგის, საკამათო შეხედულებებია. ბრიტანელ მწერალს წლებია, ტრანსფობიაში ადანაშაულებენ. მაღაზია ბუქსმითის საბავშვო ფენტეზის სექციაში კი მკითხველს ამიერიდან თაროზე ნიშნული დახვდება ამ ტექსტით:

"ჰარი პოტერს ეძებ? 2025 წლის მაისში, მწერალმა ჯოან როულინგმა ღიად განაცხადა, რომ ჰარი პოტერის სერიიდან მიღებული კერძო ქონებით აფუძნებდა როულინგის ქალთა ფონდს, ორგანიზაციას, რომლის მიზანიცაა ტრანსგენდერი ადამიანებისთვის უფლებების ჩამორთმევა 'სამსახურებში, საჯარო და მხოლოდ ქალებისთვის განკუთვნილ სივრცეებში'.

"ამ განცხადების შემდეგ, გადავწყვიტეთ, მისი წიგნების გაყიდვა შევწყვიტოთ. ზუსტად არ ვიცით, რა საქმეს მიჰყოფს ხელს 'ქალთა ფონდი', მაგრამ ის კი ვიცით, რომ ამის მონაწილე ჩვენ არ ვიქნებით.

"როგორც წიგნების ქვიარ მოყვარულებმა, მოზარდობა ჩვენც ჯადოქრებისა და ელფების გარემოცვაში გავატარეთ. შემოგვხედეთ, ეს აშკარაა. თუკი შენ ან შენს საყვარელ ადამიანს ჰარი პოტერის სამყაროს გაცნობა სურს, გირჩევთ, ამისთვის მეორადი წიგნები გამოიყენოთ".

ფოტო: The Booksmith

ვებგვერდზე, სახელწოდებით "ჯადოქრები, მაგრამ არა ის ჯადოქარი", წიგნის მაღაზია მკითხველებს ასევე ეუბნება, რომ უმჯობესია, ჰარი პოტერის მსგავსი სხვა წიგნებით დაინტერესდნენ. ბუქსმითის რეკომენდებულ ალტერნატივებს შორისაა ურსულა კ. ლე გუინის ზღვამიწეთის ჯადოქარი, ფილიპ პულმანის ჩრდილოეთის ციალი და ლი ბარდუგოს ყვავების ექვსეული.

რა ხდება როულინგის თავს

ფოტო: Getty Images

იმის მიუხედავად, რომ ჰარი პოტერი წლების შემდეგაც რჩება ფანების საყვარელ ისტორიად, ბოლო წლებში საგის ავტორი, ჯოან როულინგი, კრიტიკის სამიზნეში არაერთხელ მოხვდა. მიზეზად დიდწილად მისი შეხედულებები იქცა — მწერალი ბევრჯერ დაადანაშაულეს ტრანსფობიაში.

თავდაპირველად, ამის საფუძველი მკვლევარ მაია ფორსტეიტერის დაცვა გახდა. ეს უკანასკნელი სამსახურიდან ტრანსფობიური განცხადების — "კაცებს ქალად გახდომა არ შეუძლიათ" — გამო დაითხოვეს. მოგვიანებით, როულინგმა ტვიტერზე დაწერა, რომ "ადამიანებისთვის, რომელთაც მენსტრუაცია აქვთ, შესაფერისი სიტყვა უკვე არსებობს". შემდეგ, მწერალი თავის დეტექტიურ რომანში ბოროტმოქმედად "ქალად გადაცმული კაცის" გამოყვანისთვის გააკრიტიკეს.

კრიტიკამ კი სხვადასხვაგვარი ფორმა მიიღო — ტიკტოკის მომხმარებლები ჰარი პოტერის წიგნებსაც კი წვავდნენ. 2021 წელს როულინგმა ტვიტერზე ასევე დაწერა, რომ თავისი სახლის მისამართი "სამმა აქტივისტმა" გაასაჯაროვა. ეს ფაქტი სოციალური ქსელის ადმინისტრაციამ და შოტლანდიის პოლიციამ აღკვეთეს, თუმცა, მწერლის თქმით, მან სიკვდილის მუქარებიც კი მიიღო.

ავტორისადმი "მიმართული სიძულვილის ტალღა" არაერთმა ცნობილმა ადამიანმა, მათ შორის, ჯადოსნური არსებების მსახიობმა ედი რედმეინმა დაგმო.

2021 წელს როულინგმა ტვიტერზე სტატიაა გააზიარა, სადაც ნათქვამი იყო, რომ "პოლიცია კაცის გენიტალიების მქონე გამაუპატიურებელს ქალად აღნიშნავს, თუკი თავდამსხმელი საკუთარ თავს ქალად აიდენტიფიცირებს".

"ომი მშვიდობაა. თავისუფლება ტყვეობაა. უგუნურება ძალაა. პენისიანი ინდივიდი, რომელმაც გაგაუპატიურა, ქალია", — დაწერა მწერალმა პოსტის აღწერაში.

მწერალთან გასამიჯნად ქვიდიჩის მსოფლიო ასოციაციებმაც გადაწყვიტეს სახელის შეცვლა. ავტორი დაადანაშაულეს ანტისემიტიზმშიც.

2022 წლის აგვისტოში, როცა მწერალ სალმან რუშდის აშშ-ში თავს დაესხნენ და ფიზიკურად გაუსწორდნენ, მოკვლით დაემუქრნენ ჯოან როულინგსაც.

ამ ყველაფრის მიუხედავად, ჰარი პოტერის სამყარო იზრდება: HBO პოტერიადის მიხედვით სერიალის გადაღებებს ამ ზაფხულს დაიწყებს. პროექტის აღმასრულებელი პროდიუსერი სწორედ როულინგია.

თუ წიგნების კითხვა და მათი განხილვა არასდროს გბეზრდება, შემოგვიერთდი ჯგუფში ერთი გვერდიც და...