ოცნების პარლამენტმა "საერთო სასამართლოების შესახებ" კანონში ცვლილებები მესამე მოსმენით დაამტკიცა. კანონპროექტის დამტკიცებას 80-მა დეპუტატმა მისცა ხმა, წინააღმდეგი არავინ ყოფილა.

საკანონმდებლო პაკეტი ოცნებამ დაჩქარებული წესით განიხილა.

ცვლილებების თანახმად, მედიას სასამართლოს სხდომების გაშუქება ეზღუდება. კანონპროექტის მიხედვით, იზღუდება სასამართლოს ეზოსა და დერეფნებში გადაღებაც. პროცესების გადაღების უფლებამოსილება კი ენიჭება სასამართლოს ან სასამართლოს მიერ უფლებამოსილ პირს.

მედიასთან დაკავშირებული მუხლი ითვალისწინებს შემდეგს:

სასამართლოში (სასამართლოს შენობაში, სასამართლო სხდომის დარბაზში, სასამართლოს ეზოში) ფოტო-, კინო-, ვიდეოგადაღება და ტრანსლაცია დაუშვებელია, გარდა იმ შემთხვევისა, როდესაც ამას ახორციელებს სასამართლო ან სასამართლოს მიერ უფლებამოსილი პირი.
სასამართლო სხდომის ვიდეო და აუდიო ჩაწერა დაიშვება მხოლოდ დასაბუთებული შუამდგომლობის საფუძველზე, მოსამართლის მიერ მიღებული მოტივირებული გადაწყვეტილებით".

ამასთან, სასამართლოს შეეძლება სასამართლოს შენობაში შესული პირისათვის პირადი ნივთების, მათ შორის, მობილური ტელეფონის, კომპიუტერის, ფოტო-, კინო-, ვიდეო- ან/და აუდიოსაშუალებების ჩამორთმევა.

როგორც კანონპროექტშია აღნიშნული, სასამართლოს შეუძლია გაავრცელოს თავის ხელთ არსებული სასამართლო პროცესის ფოტო-, კინო- და ვიდეოგადაღების მასალები, თუ ეს არ ეწინააღმდეგება კანონს.

ცნობისთვის, საზოგადოებრივი მაუწყებელი უფლებამოსილია შეუზღუდავად განახორციელოს სასამართლო პროცესის ფოტოგადაღება, კინო-, ვიდეო-, აუდიოჩაწერა. კანონში აუქმებენ ჩანაწერსაც, რომლის მიხედვითაც, თუ საზოგადოებრივი მაუწყებელი არ სარგებლობს აღნიშნული ნორმით, ამ უფლებამოსილებით სარგებლობა შეუძლია სხვა საერთო საეთერო მაუწყებელს სასამართლო სხდომის დაწყების წინ საქმის განმხილველი მოსამართლისათვის წერილობითი განცხადების წარდგენის საფუძველზე.

კანონპროექტი მოსამართლეებისთვის ხელფასების ზრდასაც ითვალისწინებს. იზრდება პოზიციაზე ყოფნის წლებიც, იცვლება იუსტიციის საბჭოს დაკომპლექტების წესი და იზღუდება მოსამართლესთან დაკავშირებით გამოხატვის ფორმები.

საგულისხმოა, რომ უზენაეს, სააპელაციო და საქალაქო სასამართლოებში ხელფასები თითქმის 2-ჯერ და მეტჯერ იზრდება.

კანონპროექტის ინიციატორები არიან: არჩილ გორდულაძე, თორნიკე ჭეიშვილი, რატი იონათამიშვილი, ალუდა ღუდუშაური, დავით მათიკაშვილი, თენგიზ შარმანაშვილი, ალექსანდრე ტაბატაძე, გურამ მაჭარაშვილი, აკაკი ალადაშვილი.

"საერთო სასამართლოების შესახებ" კანონში ცვლილების შეტანის თაობაზე ინფორმაცია სრულად შეგიძლიათ ნახოთ აქ.

ასევე იხილეთ: