ქართული ოცნების დეპუტატის, რიმა ბერიძის განცხადებით, აშშ-ს დემოკრატი სენატორის ჯინ შაჰინის აზრი ქართველ ხალხს არ აინტერესებს და ურჩია "თავის ქვეყანას მიხედოს".

"ნამდვილად არ არის ჩვენი ქვეყნისთვის ჯინ შაჰინის შეფასება საინტერესო... მე ვურჩევდი, რა თქმა უნდა, ჩემს რჩევას ჯინ შაჰინი არ მიიღებდა, მაგრამ თავის ქვეყანას მიხედოს," — განაცხადა ოცნების დეპუტატმა "ფორმულას" ჟურნალისტთან საუბრისას.

ცნობისთვის, სენატის საგარეო ურთიერთობათა კომიტეტის წევრი, დემოკრატი ჯინ შაჰინი და აშშ-ის "ჰელსინკის კომისიის" თავმჯდომარე, რესპუბლიკელი როჯერ უიკერიი ეხმაურებიან საქართველოს ანტიკორუფციული ბიუროს მიერ სამოქალაქო საზოგადოების ორგანიზაციებისგან მათი საქმიანობის შესახებ "საეჭვო საკანონმდებლო საფუძვლით" დეტალური ინფორმაციის მოთხოვნას.

მათი განცხადებით, "დემოკრატიული მთავრობები საფრთხედ არ უნდა აღიქვამდნენ დამოუკიდებელი მედიის მხარდამჭერ, კრემლის პროპაგანდასთან მებრძოლ, კორუფციასთან მებრძოლ და ქალებისა და ახალგაზრდობის მხარდამჭერ ორგანიზაციებს".