დღეიდან ოთხი ივნისის ჩათვლით, საქართველოს შოთა რუსთაველის თეატრისა და კინოს სახელმწიფო უნივერსიტეტის ორგანიზებით, თბილისის საერთაშორისო სტუდენტური კინოფესტივალი გაიმართება.

31 მაისს, 20:00 საათზე, ფესტივალის ოფიციალური გახსნის საღამო გაიმართება, სადაც DJ-ის მიერ შექმნილი კინომუსიკის სეტის ფონზე, დამსწრე საზოგადოება ფესტივალის შესახებ მიიღებს ინფორმაციას, შემდეგ კი რეჟისორ გიორგი ოვაშვილის სტუდენტური ნაშრომის ვაგონეტი ჩვენება შედგება.

რაც შეეხება დახურვის საღამოს, 4 ივნისს, 20:00 საათზე, ფესტივალის დასკვნით საღამოს მუსიკალურად თბილისის მერიის ბიგ-ბენდი გააფორმებს.

დაჯილდოების ცერემონიაზე გამოვლინდებიან გამარჯვებულები შემდეგ ნომინაციებში: საუკეთესო მხატვრული, დოკუმენტური და ანიმაციური ფილმები. ასევე გაიცემა ჟიურის სპეციალური პრიზი და დიპლომები იმ სპეციალობების მიხედვით, რომლებიც მსოფლიო კინოსკოლებში ისწავლება: რეჟისურა, ოპერატორის ნამუშევარი, მონტაჟი და ხმა.

სელექციის შედეგად ფესტივალის ოფიციალურ პროგრამაში მოხვდა ცხრამეტი ქვეყნის კინოსკოლის 38 ფილმი, მათ შორისაა - აშშ, გერმანია, არგენტინა, იტალია, ჩინეთი, საფრანგეთი, ფინეთი, პოლონეთი, პორტუგალია, რუსეთი, ესპანეთი, ბრაზილია, დიდი ბრიტანეთი, ისრაელი, რუმინეთი, სამხრეთ აფრიკა, სლოვაკეთი, ბელგია და საქართველო.

2017 წლის ფესტივალის ჟიურის წევრები არიან:

• ინდოელი კინორეჟისორი, სცენარისტი და პედაგოგი აშვინ მალიქი;
• ისრაელის კინოინდუსტრიის აქტიური წევრი, პროდიუსერი ეითან ევანი;
• ლიტველი პროდიუსერი რამუნას პავილინსკასი;
• ირანელი კინემატოგრაფსტი, კარნამეს ხელოვნებისა და კულტურის ინსტიტუტის
• დამფუძნებელი და ბორდის წევრი ალირეზა სოლტანიში
• ქართველი მსახიობი ნინო კასრაძე.

ფესტივალის პროგრამა, ასევე მოიცავს ჟიურის წევრების მასტერკლასებს სხვადასხვა თემაზე:

• "რასა" - მიდგომა სინემატიკურ თხრობასთან
• როგორ განვავითაროთ წარმატებები?
• როგორ შევქმნათ ფილმის რიმეიქი
• მსახიობის მუშაობა კამერასთან და რეჟისორთან
• ურთიერთობა პროდიუსერებს და დამწყებ რეჟისორებს შორის

მასტერკლასების გარდა, თეატრალური უნივერსიტეტის კინოკლუბში გაიმართება ყველა საკონკურსო ფილმის ჩვენება.

კინოჩვენებებზე დასწრება თავისუფალია (მის: აღმაშენებლის გამზ. 40).

2017 წელს ფესტივალს ჰყავს საპატიო სტუმარი - იერჟი რუდჟინსკი, პოლონელი ოპერატორი, რომელიც გახლავთ ლოძის კინოსკოლის პროფესორი. მას აქტიური შემოქმედებითი პროცესები აკავშირებს ისეთ ცნობილ რეჟისორებთან, როგორიც არიან კშიშტოფ კისლიოვსკი, ანჯეი ვაიდა და სხვა. პოლონელი ოპერატორი სამ დღიან ვორქშოფს ჩაატარებს ქართველ სტუდენტებთან: ფერთან და კამერასთან მუშაობის მეთოდოლოგიისა და სხვა თემების შესახებ.

წელს, ფესტივალს დაესწრება საკონკურსო პროგრამის ათამდე უცხოური ფილმის ავტორი და გადამღები ჯგუფის წევრი, რაც ხელს შეუწყობს ქართველი და უცხოელი სტუდენტების, მომავალი კოლეგების გაცნობას და სამომავლო თანამშრომლობის პერსპექტივას.