თეირანი, ისრაელური ჯაშუშური თრილერი, რომლის ახალი სეზონის პრემიერაც ახლო აღმოსავლეთში მიმდინარე კონფლიქტის გამო იგვიანებს, მალე დაუბრუნდება მაყურებელს. ამერიკული მედიის ცნობით, ღაზის სექტორში ომის თანდათან მინელებასთან ერთად, სერიალის მესამე სეზონის პრემიერა მსოფლიოში უახლოეს თვეებში შედგება.

თეირანის მთავარი გმირი ისრაელის სადაზვერვო სამსახურის — მოსადის — აგენტი, ირანში დაბადებული ებრაელი თამარ რაბინიანია, რომელიც ქვეყანაში საგანგებო მისიით ბრუნდება. ემის ჯილდოს მფლობელი პირველი ისრაელური სერიალის წინა სეზონებს დიდი გამოხმაურება მოჰყვა. მეორე სეზონში ერთ-ერთი პერსონაჟი ამერიკელმა კინოვარსკვლავმა გლენ ქლოუზმა განასახიერა, მესამე სეზონში კი სატელევიზიო შოუს ცნობილი ინგლისელი მსახიობი ჰიუ ლორიც შეუერთდა სამხრეთაფრიკელი ბირთვული ინსპექტორის როლში.

თეირანის შემქმნელი ისრაელის საზოგადოებრივი მაუწყებელია, მსოფლიოში მის ჩვენებას კი Apple TV+ უზრუნველყოფს, რომელმაც ახალი სეზონის პრემიერის თარიღი რამდენჯერმე გადასწია. მესამე სეზონის გადაღებები ჯერ კიდევ 2023 წლის ზაფხულში დასრულდა, მაგრამ მას შემდეგ, რაც იმავე წლის 7 ოქტომბერს ისრაელს ირანის მხარდაჭერილი ტერორისტული ორგანიზაცია, ჰამასი, დაესხა თავს და ღაზაში ომი დაიწყო, Apple TV+-მა განუსაზღვრელი დროით გადადო სერიალის გამოსვლა. თუმცა, ისრაელში ახალი სეზონის პრემიერა შარშან დეკემბერში მაინც შედგა.

დისტრიბუტორი კომპანიის არგუმენტაცია, რომ სერიალის სიუჟეტი მეტისმეტად სენსიტიური შეიძლება ყოფილიყო მიმდინარე მოვლენების გათვალისწინებით, აზრს მოკლებული არაა: თეირანმა რამდენჯერმე "იწინასწარმეტყველა" რეგიონში მომხდარი ამბები. მაგალითად, პირველ სეზონში ისრაელი ირანის ბირთვულ ობიექტებს ბომბავს (ცოტა ხნის წინ განხორციელებული თავდასხმის მსგავსად), მეორე სეზონში კი ერთ-ერთ ირანელ სამხედრო ლიდერს მობილური ტელეფონის გამოყენებით დისტანციურად აფეთქებენ (როგორც ჰეზბოლას წევრები ააფეთქეს პეიჯერებით შარშან).

თეირანის მესამე სეზონში კი ასეთივე რეალისტური სიუჟეტი გრძელდება. ამბავი კვლავაც ირანის ბირთვული პროგრამის გარშემო ვითარდება. ისრაელელი მაყურებელი, რომელმაც ახალი სერიები უკვე ნახა, ამბობს, რომ "წინამორბედების მსგავსად, ეს სეზონიც ისრაელელი პერსონაჟების მიმართ კეთილგანწყობით გამოირჩევა, მაგრამ, ამავდროულად, მოსადის შავბნელ მხარეს აჩვენებს".

ზოგიერთი თეირანს მართლაც მიიჩნევს "ისრაელურ პროპაგანდად". თუმცა, კრიტიკოსების უმრავლესობა თვლის, რომ სერიალი ისრაელი-ირანის მრავალწლიანი დაძაბული ურთიერთობის კომპლექსურობას და ორივე მხარის ინტერესებს აჩვენებს.

ამასობაში კი, დაწყებულია მუშაობა თეირანის მეოთხე სეზონზეც. გადაღებები სტარტს ამ შემოდგომაზე აიღებს საბერძნეთის დედაქალაქ ათენში, სადაც წინა სეზონებზეც მუშაობდნენ. როგორც ცნობილია, მეოთხე სეზონის სცენარის დიდი ნაწილი ხელახლა დაიწერა, რათა 7 ოქტომბრის შემდგომი გეოპოლიტიკური ვითარება უკეთ აესახა.