ქართული ოცნების დეპუტატი, გია ვოლსკი უკრაინის ელჩის გაწვევის გადაწყვეტილებასაც ნაციონალურ მოძრაობას უკავშირებს. მისი თქმით, ეს ადამიანთა იმ ჯგუფის მიერ არის განპირობებული, რომლებიც საკვანძო ადგილებს იკავებენ და ფაქტობრივად ნაციონალური მოძრაობის შემადგენელი ნაწილი არიან.

"ეს გადაწყვეტილება განპირობებულია ადამიანთა იმ ჯგუფის მიერ, რომლებიც დღეს საკვანძო ადგილებს იკავებენ და ფაქტობრივად არიან ნაციონალური მოძრაობის შემადგენელი ნაწილი.

შეურაცხყოფაა არამარტო ხელისუფლებისადმი, არამედ საზოგადოების ძალიან დიდი ნაწილისადმი, რომელიც ყოველგვარი ანგარების გარეშე ლუკმას უყოფს უკრაინის დაზარალებულ, მძიმე მდგომარეობაში მყოფ მოქალაქეებს, რომლებიც ინახავენ უკრაინის მოქალაქეების დიდ ნაწილს საქართველოში და რომლებიც უკან არანაირად არასდროს არ დაიხევენ, რათა დაეხმარონ უკრაინელ ხალხს", — ამბობს ვოლსკი.

უკრაინულმა მედიამ დაწერა, რომ ვოლოდიმირ ზელენსკიმ საქართველოდან და მაროკოდან ელჩები გაიწვია. როგორც ზელენსკი განმარტავს, არიან ადამიანები, რომლებიც ყველასთან მუშაობენ სახელმწიფოს დასაცავად და არიან ისეთებიც, რომლებიც მხოლოდ "თანამდებობაზე დარჩენისთვის" მუშაობენ. სწორედ ამ დროს პრეზიდენტმა თქვა, რომ ხელი მოაწერა ასეთი ადამიანის გაწვევას და მაროკოს ელჩი დაასახელა, იქვე კი აღნიშნა, რომ უკრაინის ელჩი საქართველოდან სამშობლოში დაბრუნებულია. ეს დაბნეულობას იწვევს, რადგან ზელენსკიმ კონსულტაციებისთვის ელჩი ერთი თვის წინ გაიწვია, თუმცა ამ დრომდე იგორ დოლგოვი საქართველოში იმყოფებოდა.