უკრაინული მედია წერს, რომ ვოლოდიმირ ზელენსკიმ საქართველოდან და მაროკოდან ელჩები გაიწვია. მათი თქმით, ამის შესახებ უკრაინის პრეზიდენტმა ვიდეომიმართვაში ისაუბრა, რომელშიც ელჩები გააკრიტიკა.

როგორც ზელენსკი განმარტავს, არიან ადამიანები, რომლებიც ყველასთან მუშაობენ სახელმწიფოს დასაცავად და არიან ისეთებიც, რომლებიც მხოლოდ "თანამდებობაზე დარჩენისთვის" მუშაობენ. სწორედ ამ დროს პრეზიდენტმა თქვა, რომ ხელი მოაწერა ასეთი ადამიანის გაწვევას და მაროკოს ელჩი დაასახელა, იქვე კი აღნიშნა, რომ უკრაინის ელჩი საქართველოდან სამშობლოში დაბრუნებულია. ეს დაბნეულობას იწვევს, რადგან ზელენსკიმ კონსულტაციებისთვის ელჩი ერთი თვის წინ გაიწვია, თუმცა ამ დრომდე იგორ დოლგოვი საქართველოში იმყოფებოდა.

"მინდა აღვნიშნო კიდევ რამდენიმე მნიშვნელოვანი რამ. პირველი — არიან ისეთები, რომლებიც ყველასთან ერთად მუშაობენ სახელმწიფოს დასაცავად. რათა უკრაინამ ბრძოლაში მოიპოვოს თავისი მომავალი. ჩვენ ვაფასებთ თითოეული ასეთი ადამიანის შრომას და არიან ისეთებიც, რომლებიც ტყუილად კარგავენ დროს და მუშაობენ მხოლოდ თანამდებობაზე დარჩენისთვის.

დღეს ხელი მოვაწერე პირველ განკარგულებას ასეთი ადამიანის გაწვევის შესახებ. უკრაინის ასეთი ელჩის მაროკოდან. ასევე, დაბრუნებულია ელჩი საქართველოდან. მთელი პატივისცემით: არ იქნება იარაღი, არ იქნება სანქციები, არანაირი შეზღუდვა რუსული ბიზნესისთვის — გთხოვთ, მოძებნოთ სხვა სამუშაო", — თქვა მან.

ზელენსკიმ ვიდეოში ხაზი გაუსვა, რომ დიპლომატიური ფრონტი მნიშვნელოვანია და უახლოეს დღეებში ლათინურ ამერიკაში, ახლო აღმოსავლეთში, სამხრეთ-აღმოსავლეთ აზიასა და აფრიკაში მათი წარმომადგენლების მუშაობიდან მოუთმენლად ელოდება შედეგებს.

"ასეთივე შედეგებს ველოდები სამხედრო ატაშეებისგან. დიპლომატიური ფრონტი ერთ-ერთი მთავარი ფრონტია. და ყველამ იქ უნდა იმუშაოს რაც შეიძლება ეფექტურად გამარჯვებისთვის, და ჯარის დახმარებისთვის. როგორც თითოეული ჩვენი დამცველი ბრძოლის ველზე, ისევე თითოეული დიპლომატიურ ფრონტზე", — აღნიშნა ზელენსკიმ.

ზელენსკიმ საქართველოდან ელჩი კონსულტაციებისთვის პირველ მარტს გაიწვია. მაშინ უკრაინის პრეზიდენტმა განაცხადა, რომ ამის მიზეზი სანქციებზე "ამორალური პოზიცია" და უკრაინაში მოხალისეების წასვლაში ხელის შეშლა იყო.

საქართველოში უკრაინის ელჩის მოვალეობას ანდრეი კასიანოვი ასრულებს. სპეციალურ ბრიფინგზე მან აღნიშნა, რომ ზელენსკი კონსულტაციებზე გაწვეულ ელჩთან სხვადასხვა საკითხს, მათ შორის, უკრაინაზე საქართველოს პოზიციას განიხილავდა.

ამ დრომდე ცნობილი იყო, რომ ელჩი იგორ დოლგოვი საქართველოშია. ის რამდენჯერმე იმყოფებოდა უკრაინაში დაღუპული ქართველი მებრძოლების ხსნოვის პატივსაცემად გამართულ აქციაზე.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში