ევროკავშირი რუსეთს ახალ სანქციებს უწესებს. ურსულა ფონ დერ ლაიენის ცნობით, პირველ რიგში, მათი პაკეტი მოიცავს ფინანსურ სანქციებს, რომელიც რუსეთის საბანკო ბაზრის 70%-სა და მნიშვნელოვან, მათ შორის თავდაცვის სფეროში არსებულ, სახელმწიფო კომპანიებს შეეხებათ.

"მეორე, ჩვენი სამიზნეა ენერგეტიკული სექტორი, საკვანძო ეკონომიკური არეალი, რომელიც განსაკუთრებით სარგებლის მომტანია რუსეთის სახელმწიფოსთვის. ჩვენი საექსპორტო აკრძალვა დააზარალებს ნავთობის სექტორს, რადგან რუსეთისთვის შეუძლებელს გახდის, რომ ნავთობის გადამამუშავებელი ქარხნები განაახლოს", — წერს ლაიენი Twitter-ზე.

მისივე თქმით, მესამე პუნქტი იქნება ევროკავშირის მიერ რუსული ავიაკომპანიებისთვის თვითმფრინავებისა და სამხედრო აღჭურვილობის მიყიდვა. მეოთხე, რაც EU-ს პაკეტში შევა, მნიშვნელოვან ტექნოლოგიებზე რუსეთის წვდომის შეზღუდვა იქნება. ბოლოს, როგორც ლაიენმა აღნიშნა, სანქციები შეეხება დიპლომატების, მათთან დაკავშირებული ჯგუფებისა და ბიზნესის წარმომადგენლების ვიზებს.

ომის დაწყების შემდეგ, რუსეთს სანქციები დაუწესეს ამერიკამ, ბრიტანეთმა, კანადამ და იაპონიამაც. კანადის სანქციები შეეხება 62 ფიზიკურ და იურიდიულ პირს, რომელთა შორის ელიტისა და მსხვილი ბანკების წევრები არიან. რაც შეეხება აშშ-ს, პრეზიდენტის, ჯო ბაიდენის თქმით, მათი სამიზნე 4 მსხვილი რუსული ბანკი გახდა, რომელთა საერთო აქტივები 1 ტრილიონ დოლარს აჭარბებს. პარალელურად, ბრიტანეთი ყველა მსხვილ რუსულ ბანკს გაუყინავს აქტივებს და შეზღუდვებს დააწესებს ექსპორტზეც.

გასული 24 საათის მთავარი ამბებია:

  • პუტინი უკრაინაში შეიჭრა და ომი დაიწყო;
  • რუსულმა ჯარებმა უკრაინას სხვადასხვა ტერიტორიიდან, მათ შორის ბელარუსიდან შეუტიეს, რასაც ლუკაშენკო უარყოფს;
  • თავდასხმა სხვადასხვა ქალაქსა და რეგიონში, მათ შორის, კიევის ოლქშიც მოხდა;
  • რუსებმა კონტროლი დაამყარეს რამდენიმე აეროდრომსა და აეროპორტზე;
  • რუსებმა ხელში ჩაიგდეს ჩერნობილის ატომური სადგური;
  • ევროკავშირმა, ბრიტანეთმა, აშშ-მ და კანადამ რუსეთს ახალი სანქციები დაუწესეს;
  • უკრაინაში კომენდანტის საათი და საომარი მდგომარეობა გამოცხადდა;
  • უკრაინამ რუსეთთან დიპლომატიურ ურთიერთობები გაწყვიტა;
  • ომის გასაპროტესტებლად აქციები მსოფლიოს სხვადასხვა ქალაქში, მათ შორის, მოსკოვში გაიმართა, სადაც ასეულობით ადამიანი დააკავეს;
  • ორივე მხარეს დაიღუპა ათეულობით სამხედრო, ზუსტი რაოდენობა უცნობია;
  • რუსული რუბლი რეკორდულად გაუფასურდა;
  • რუსეთის თავდასხმის შედეგად 137 უკრაინელი გარდაიცვალა, 169 დაიჭრა.

გაიგეთ მეტი: