7 იანვარს, საშობაო ღონისძიების დროს, საგარეჯოში მომხდარი დაპირისპირებისას დაკავებულის ადვოკატი, ალექსანდრე კობაიძე აცხადებს, რომ განყოფილებაში 10-მდე ნასვამმა პოლიციელმა დაკავებულებს სცემეს. მისი თქმით, პოლიციას საქმის გახმაურება არ სურდა.

"ძალიან კარგია, რომ არსებობენ მაღალი მოქალაქეობრივი პასუხისმგებლობის პიროვნებები. მათ შორის, არის ასეთი პიროვნება, რომელიც საგარეჯოელია, რომელიც შეესწრო ამ ფაქტს და ამ ადამიანმა გენინსპექციას მიმართა და დააფიქსირა პოზიცია, რომ იგი შეესწრო თუ როგორ უმოწყალოდ სცემდნენ ნასვამი პოლიციელები ორ ახალგაზრდას პოლიციის განყოფილებაში. თქვა, რომ ცემისგან რომ დაიღალნენ, შემდეგ უკვე სკამებს ესროდნენო. ეს ფაქტი, რა თქმა უნდა, ასე გამოუძიებელი არ უნდა დარჩეს და აუცილებელია, რომ ამ საკითხთან დაკავშირებით გენინსპექცია უფრო ინტენსიურად ჩაერიოს", — აცხადებს ის.

ადვოკატი ამბობს, რომ დაპირისპირება სამართალდამცავებსა და დაკავებულებს შორის მას შემდეგ დაიწყო, რაც ერთი პირი სცენაზე ავიდა და კონცერტის შეწყვეტა ითხოვა. მისი განმარტებით, მიზეზი, იმ დღეს გარდაცვლილი ახალგაზრდა იყო. კობაიძე ამბობს, რომ ამ დროს მის დაცვის ქვეშ მყოფს სცენაზე საცეკვაოდ ასვლა უნდოდა, რისი უფლებაც მას სამართალდამცავებმა არ მისცეს, რადგან, ეგონათ, რომ იმავე მოწოდების გაკეთება სურდა.

"პოლიციას ეგონა, რომ ესენი ერთად იყვნენ, არადა ეს ერთი სხვა იყო და ეს ორი სხვა იყო. ესენი არ აუშვეს, მოხდა კონფლიქტი, რომ რატომ არ მიშვებ სცენაზე და მოხდა პოლიციასთან შელაპარაკება. შელაპარაკება გადაიზარდა ფიზიკურ შეხლა-შემოხლაში, მერე გადაიზარდა უკვე ცემაში. პოლიციელებმა ორი თხელი აღნაგობის ახალგაზრდა შეათრიეს განყოფილებაში, იქვეა, 3-4 მეტრში და იქ უკვე ადამიანის თვალწინ... ასეთი რამე თქვა ამ ადამიანმა, მთავარმა მოწმემ, რომ ვთხოვდი პოლიციელებს, რომ მე ნუ მაყურებინებთ ამ ახალგაზრდების ცემასო, მე რა შუაში ვარო. მერე რომ მოვითხოვე გაყვანა, გამიყვანესო და ღმუილი მესმოდაო ამ ახალგაზრდებისო, ისე აწამებდნენ და ისე სცემდნენო", — ამბობს კობაიძე.

ადვოკატის ცნობით, დაკავებულებს ბრალი პოლიციელებისთვის წინააღმდეგობის გაწევის მუხლით წარუდგინეს და ისინი გლდანის პენიტენციურ დაწესებულებაში იმყოფებიან. მისივე თქმით, მათ სხეულის რამდენიმე ადგილას, მათ შორის, ხელებზე, ზურგისა და სახის არეში დაზიანებები აქვთ მიღებული.

"მივმართავ პროკურატურას, ეს ადამიანები სწავლობენ, აქტიური ახალგაზრდები არიან საგარეჯოში, ხელოვანი ხალხია, ანუ, არ არიან კრიმინალები. იქნებ დაინტერესდეთ და მოახდინოთ რეაგირება, რაც შეიძლება მალე, რომ აღკვეთის ღონისძიება მაინც შეეცვალოთ [...] დაინტერესდეს გენინსპექცია და დაუყოვნებლივ მოახდინოს იმ ადამიანების მიმართ გამოძიება, ვინც ეს დანაშაული ჩაიდინა", — აღნიშნა მან.

შინაგან საქმეთა სამინისტროში განაცხადეს, რომ საგარეჯოში მომხდარი დაპირისპირებისას ორი ადამიანი დააკავეს, ხოლო, დაშავებულია 2 პოლიციელი. მათივე ცნობით, გამოძიება სისხლის სამართლის კოდექსის 353-ე მუხლით მიმდინარეობს, რაც გულისხმობს წინააღმდეგობას, მუქარას ან ძალადობას საზოგადოებრივი წესრიგის დამცველის ან ხელისუფლების სხვა წარმომადგენლის მიმართ.