საგარეჯოში შობის ღამეს ფიზიკური დაპირისპირება მოხდა. შინაგან საქმეთა სამინისტროს ცნობით, მომხდარზე დაკავებულია ორი ადამიანი. გავრცელებული ინფორმაციით, დაშავებულია 2 პოლიციელი.

დაპირისპირება საშობაო კონცერტის მსვლელობისას მოხდა, ადგილობრივები სცენაზე ავიდნენ. ერთ-ერთის თქმით, ავღანეთში მებრძოლი ჯარისკაცის დაკრძალვის მეორე დღეს ქალაქში საახალწლო ღონისძიებები არ უნდა გამართულიყო.

"საქართველოს სადარაჯოზე ომარ ხუბულური იდგა, სამჯერ ავღანეთში მყოფი, გარდაიცვალა ტრაგიკულად და დღეს აქ კონცერტი გამართეთ. მთავრობას ეს არ უნდა გაეკეთებინა, ეს ნაძვის ხეც უნდა მოეშალა", — თქვა სცენაზე ასულმა ადგილობრივმა.

როგორც On.ge-ს შსს-ში უთხრეს, მომხდარზე გამოძიება სისხლის სამართლის კოდექსის 353-ე მუხლით მიმდინარეობს, რაც გულისხმობს წინააღმდეგობას, მუქარას ან ძალადობას საზოგადოებრივი წესრიგის დამცველის ან ხელისუფლების სხვა წარმომადგენლის მიმართ.