მიხეილ სააკაშვილის პირადი ექიმის, ნიკოლოზ ყიფშიძის შეფასებით, ექსპრეზიდენტის მიერ მკურნალობის შეწყვეტა კატასტროფა იქნება. ის განმარტავს, რომ ასეთ შემთხვევაში მთელი მკურნალობის პროცესის თავიდან დაწყება გახდება საჭირო.

"პრეზიდენტმა კიდევ ერთხელ მითხრა, რომ ის ნამდვილად შეწყვეტს მკურნალობას ხვალ დილიდან, თუ არ შეუშვებენ დეპუტატებს. ეს იქნება კატასტროფა, პირდაპირ გეუბნებით, მაშინ თავიდან უნდა დავიწყოთ ყველაფერი. ასევე გეტყვით, რომ მისი სრული იზოლაციაც ძალიან ცუდია მისი ჯანმრთელობისთვის", — განაცხადა ყიფშიძემ სააკაშვილის მონახულების შემდეგ.

დღეს, სააკაშვილის ადვოკატმა, ბექა ბასილაიამ განცხადა, რომ დეპუტატებს ექსპრეზიდენტთან შესვლის შესაძლებლობას არ აძლევენ. ადვოკატის შეფასებით, ამის სამართლებრივი წინაპირობაც არ არსებობს. მან თქვა, რომ თუ ასე გაგრძელდა, მიხეილ სააკაშვილი მკურნალობის პროცესზე უარს იტყვის.

მიხეილ სააკაშვილი გორის სამხედრო ჰოსპიტალში მე-6 დღეა იმყოფება. იქ გადაყვანა იუსტიციის სამინისტრომ 19 ნოემბერს შესთავაზა, რასაც ექსპრეზიდენტი დათანხმდა და 50-დღიანი შიმშილობა შეწყვიტა.

გუშინ, 24 ნოემბერს, სახელმწიფო კონსილიუმის წევრმა და ენდოკრინოლოგმა, ელენე გიორგაძემ განაცხადა, რომ ექსპრეზიდენტის მკურნალობა გეგმის მიხედვით მიდის და მისი მდგომარეობა ნელ-ნელა უმჯობესდება. მისი თქმით, სააკაშვილს დღეს დილით სიარულის პირველი მცდელობა ჰქონდა, რაც ცოტა გაუჭირდა, თუმცა საღამოს 5 წუთის განმავლობაში დერეფანში გავლა შეძლო. ამასთა, უკრაინელმა დეპუტატმა, ლიზა იასკომ განაცხადა, რომ ექსპრეზიდენტმა გორის სამხედრო ჰოსპიტალში გადაყვანის შემდეგ 3 კილო დაიკლო და ის კიდევ უფრო სუსტადაა, ვიდრე წინა დღეებში. მისი თქმით, პოსტრამვულ პერიოდში სააკაშვილს სუფთა ჰაერის სუნთქვის საშუალება არ ეძლევა, რაც ცუდია.