მზია ამაღლობელის საქმის მთავარი ფიგურანტი — ირაკლი დგებუაძე შსს-ს ორგანიზებულ დანაშაულთან ბრძოლის მთავარი სამმართველოს უფროსად დანიშნეს. ამის შესახებ ცნობას "ნეტგაზეთი" ავრცელებს.

ირაკლი დგებუაძემ ბათუმის პოლიციის უფროსის თანამდებობა 2025 წლის სექტემბერში დატოვა. ამის შედეგ ის ცენტრალური კრიმინალური პოლიციის კრიმპოლის საერთაშორისო თანამშრომლობის ცენტრის უფროსი გახდა, თუმცა ამ თანამდებობაზე ცოტა ხნით იმუშავა და მალევე ორგანიზებულ დანაშაულთან ბრძოლის მთავარი სამმართველოს უფროსი გახდა.

"ნეტგაზეთი" წერს, რომ სამმართველო, რომლის უფროსადაც დგებუაძე მუშაობს, იძიებს სისტემურ დანაშაულს, რომელსაც აქვს სტრუქტურა, ფინანსური რესურსი და დანაშაულებრივი მიზანი. მათ შორის: ქურდულ სამყაროსთან და "კანონიერ ქურდებთან" ბრძოლა; ტრეფიკინგთან ბრძოლა; კიბერდანაშაულთან ბრძოლა; მიმალვაში მყოფი პირების გამოვლენა და ა.შ.

ირაკლი დგებუაძე "ნეტგაზეთისა" და "ბათუმელების" გამომცემლისა და დირექტორის, მზია ამაღლობელის საქმეში "დაზარალებულად" ცნეს.

მოსამართლე ნინო სახელაშვილმა მზია ამაღლობელს ირაკლი დგებუაძისთვის სილის გაწვნისთვის 2-წლიანი პატიმრობა მიუსაჯა. სასამართლომ ამაღლობელს ბრალდება 353-ე მუხლის პირველი ნაწილით გადაუკვალიფიცირა, რაც პოლიციის მუშაკისთვის წინააღმდეგობის გაწევას, საზოგადოებრივი წესრიგის დაცვისთვის ხელის შეშლას გულისხმობს. მანამდე პროკურატურა ამაღლობელს პოლიციელზე თავდასხმას ედავებოდა, რაც 4-დან 7 წლამდე პატიმრობას ითვალისწინებდა.