ჟურნალისტური ეთიკის ქარტია "ბათუმელების" და ნეტგაზეთის" თანადამფუძნებლისა და დირექტორის, მზია ამაღლობელის დაკავებიდან 1 წლისთავს ეხმაურება.

ქარტიის განცხადებაში ვკითხულობთ, რომ "ამაღლობელის პატიმრობაში დატოვება განგრძობითი სირცხვილია ქართული სახელმწიფოსთვის და იმ პოლიტიკური ძალისთვის, რომელიც მას მართავს".

"დღეს, 12 იანვარს, სრულდება ერთი წელი, რაც მზია ამაღლობელი სისხლის სამართლის წესითაა დაკავებული და უკანონო პატიმრობაში იმყოფება. მზია ამაღლობელის პატიმრობაში დატოვება განგრძობითი სირცხვილია ქართული სახელმწიფოსთვის და იმ პოლიტიკური ძალისთვის, რომელიც მას მართავს. გაათავისუფლეთ მზია ამაღლობელი და დაუბრუნეთ საზოგადოებას პასუხისმგებლიანი მოქალაქე, ხოლო პროფესიულ თემს — კეთილსინდისიერი პროფესიონალი, ერთგული კოლეგა და მეგობარი," — წერს ჟურნალისტური ეთიკის ქარტია.

2026 წლის 12 იანვარს ერთი წელი შესრულდება დამოუკიდებელი გამოცემების – "ბათუმელებისა" და "ნეტგაზეთის" დამფუძნებლის, ჟურნალისტ მზია ამაღლობელის დაპატიმრებიდან. მზია ამაღლობელი, საბჭოთა კავშირის დაშლის შემდეგ, პირველი პოლიტიკური პატიმარი ჟურნალისტი ქალია საქართველოში. იგი 2025 წლის 11-12 იანვრის ღამეს, ქალაქ ბათუმში მიმდინარე საპროტესტო აქციაზე, ორჯერ დააკავეს. თავდაპირველად დააპატიმრეს ბათუმის პოლიციის სამმართველოს დამხმარე სათავსოს კედელზე საპროტესტო სტიკერის გაკვრისათვის, რომელზეც ეწერა — "იფიცება საქართველო". ეს სტიკერი პოლიციელებმა გაკვრისთანავე მოხსნეს. დაკავებიდან რამდენიმე საათში, მზია ამაღლობელი ხელწერილის საფუძველზე გაათავისუფლეს, თუმცა, მალევე კვლავ დააკავეს ბათუმის პოლიციის უფროსის — ირაკლი დგებუაძისთვის — სილის გაწვნისთვის.

ჟურნალისტის წინააღმდეგ გამოძიება დაიწყო სისხლის სამართლის კოდექსის 353 პრიმა მუხლის პირველი ნაწილით. მზია ამაღლობელს აღკვეთის ღონისძიების სახით წინასწარი პატიმრობა ჰქონდა შეფარდებული. 2025 წლის 6 აგვისტოს ბათუმის საქალაქო სასამართლოს მოსამართლე ნინო სახელაშვილმა მზია ამაღლობელს ბრალი გადაუკვალიფიცირა სისხლის სამართლის 353-ე მუხლის პირველი ნაწილით და 2-წლით თავისუფლების აღკვეთა მიუსაჯა.

შეგახსენებთ, რომ 12 იანვარს "ბათუმელებისა" და "ნეტგაზეთის" თანადამფუძნებლისა და დირექტორის, მზია ამაღლობელის უკანონო დაპატიმრებიდან ერთი წლის თავზე, მარში — "მზიას თავისუფლებისთვის", გაიმართება. მზია ამაღლობელის მხარდამჭერები 20:00 საათზე მარჯანიშვილის მეტროსთან შეიკრიბებიან და მსვლელობით პარლამენტისკენ წავლენ.