ხანგრძლივი მოლოდინის შემდეგ, გახმაურებული სერიალი თეირანი მაყურებელს ახალი სეზონით დაუბრუნდა. ისრაელური ჯაშუშური თრილერის მესამე სეზონის პრემიერა Apple TV-ზე 9 იანვარს შედგა. სეზონი ამჯერადაც რვა ეპიზოდს მოიცავს, ახალ სერიებს კი პარასკევობით ვიხილავთ.

თეირანის მთავარი გმირი ისრაელის სადაზვერვო სამსახურის — მოსადის — აგენტი, ირანში დაბადებული ებრაელი თამარ რაბინიანია, რომელიც ქვეყანაში საგანგებო მისიით ბრუნდება. მესამე სეზონში სიუჟეტი კიდევ უფრო დრამატულად ვითარდება, რადგან ამჯერად თამარი არა მხოლოდ ირანის ისლამური რევოლუციის გვარდიას, არამედ მოსადსაც გაურბის. ამ სეზონში ახალი პერსონაჟიც ჩნდება: სამხრეთაფრიკელი ბირთვული ინსპექტორი ერიკ პიტერსონი, რომლის როლსაც ცნობილი ინგლისელი მსახიობი ჰიუ ლორი ასრულებს.

თეირანის შემქმნელი ისრაელის საზოგადოებრივი მაუწყებელია, მსოფლიოში მის ჩვენებას კი Apple TV+ უზრუნველყოფს, რომელმაც ახალი სეზონის პრემიერის თარიღი რამდენჯერმე გადასწია. მესამე სეზონის გადაღებები ჯერ კიდევ 2023 წლის ზაფხულში დასრულდა, მაგრამ მას შემდეგ, რაც იმავე წლის 7 ოქტომბერს ისრაელს ირანის მხარდაჭერილი ტერორისტული ორგანიზაცია, ჰამასი, დაესხა თავს და ღაზაში ომი დაიწყო, Apple TV+-მა განუსაზღვრელი დროით გადადო სერიალის გამოსვლა. თუმცა, ისრაელში ახალი სეზონის პრემიერა 2024 წლის დეკემბერში მაინც შედგა.

დისტრიბუტორი კომპანიის არგუმენტაცია, რომ სერიალის სიუჟეტი მეტისმეტად სენსიტიური შეიძლება ყოფილიყო მიმდინარე მოვლენების გათვალისწინებით, აზრს მოკლებული არაა: თეირანმა რამდენჯერმე "იწინასწარმეტყველა" რეგიონში მომხდარი ამბები. მაგალითად, პირველ სეზონში ისრაელი ირანის ბირთვულ ობიექტებს ბომბავს (რამდენიმე თვის წინ განხორციელებული თავდასხმის მსგავსად), მეორე სეზონში კი ერთ-ერთ ირანელ სამხედრო ლიდერს მობილური ტელეფონის გამოყენებით დისტანციურად აფეთქებენ (როგორც ჰეზბოლას წევრები ააფეთქეს პეიჯერებით 2024 წელს).

ზოგიერთი თეირანს "ისრაელურ პროპაგანდად" მიიჩნევს, თუმცა, კრიტიკოსების უმრავლესობა თვლის, რომ სერიალი ისრაელი-ირანის მრავალწლიანი დაძაბული ურთიერთობის კომპლექსურობას და ორივე მხარის ინტერესებს აჩვენებს.

სანამ ჩვენ ახალ სერიებს მივადევნებთ თვალს, უკვე დაწყებულია მუშაობა მეოთხე სეზონზეც. როგორც ცნობილია, ამ სეზონის სცენარის დიდი ნაწილი ხელახლა დაიწერა, რათა 7 ოქტომბრის შემდგომი გეოპოლიტიკური ვითარება უკეთ აესახა.

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…