საერთაშორისო გამჭვირვალობა — საქართველოს შეფასებით, ზუგდიდში ძველი, 2017 წლის მოწვევის საკრებულოს გადაწყვეტილება, დაჩქარებული წესით განიხილოს ქალაქის 2022 წლის ბიუჯეტის პროექტი, პრობლემებს შეიცავს და ხელს უშლის ახალარჩეულ საკრებულოს, შეასრულოს თავისი ფუნქცია. ორგანიზაციის განცხადებით, ძველი საკრებულოს ეს ინიციატივა ფაქტობრივად, პრემიერმინისტრის განცხადების გაგრძელებაა, რომ ცენტრალურ ხელისუფლებაში ქართული ოცნებაა და მათ გარეშე ოპოზიცია ადგილობრივ დონეზე "ნაბიჯს ვერ გადადგამს".

"ახალარჩეულ საკრებულოში პოლიტიკური ძალების ახალი შემადგენლობა და პროპორციაა. შესაბამისად, ბიუჯეტის საკითხის გარშემო შესაძლო დისკუსია იქნებოდა საშუალება ადგილზე პოლიტიკური პარტიების თანამშრომლობისთვის", — ნათქვამია განცხადებაში.

ამასთან TI აღნიშნავს, რომ ცესკო გამიზნულად არ ნიშნავს ახალარჩეული საკრებულოს სხდომებს. ორგანიზაციაში განმარტავენ, რომ მნიშვნელოვანია, ცენტრალურმა საარჩევნო კომისიამ დროულად დანიშნოს ეს სხდომა, რათა საკრებულოებს მიეცეს საქმიანობის წარმართვის, მათ შორის 2022 წლის ბიუჯეტის პროექტის განხილვისა თუ დამტკიცების შესაძლებლობა, და ახალარჩეული საკრებულოს წევრები სრულფასოვნად ჩაერთონ პროცესებში.

ორგანიზაცია განმარტავს, რომ თუ საკრებულო 2022 წლის 1 აპრილამდე ვერ მიიღებს ბიუჯეტს, მთავრობა საკრებულოს და მერს ვადამდე შეუწყვეტს უფლებამოსილებას. მათივე განცხადებით, მმართველი პარტია ცდილობს, თავი დაიზღვიოს, რადგან საკრებულოში პოლიტიკურ ძალთა ისეთი კონფიგურაციაა, რომ ახალმა შემადგენლობამ, შესაძლოა, ვერ დაამტკიცოს ზუგდიდის 2022 წლის ბიუჯეტი.

გუშინ, 17 ნოემბერს ზუგდიდში ძველი, 2017 წლის მოწვევის საკრებულო 2022 წლის ბიუჯეტის პროექტის განხილვას ცდილობდა, რასაც ხმაური მოჰყვა. ენმ-ს წევრი ანა წითლიძე აცხადებდა, რომ გაუგებარია რა პოლიტიკური პასუხისმგებლობა უნდა აიღონ ბიუჯეტის მიღებაზე ან შესრულებაზე იმ ადამინებმა, რომლებიც არ არიან ახალი საკრებულოს წევრები.

ამის გასაპროტესტებლად ზუგდიდის საკრებულოში მოშიმშილე ენმ-ს წევრებმა სხდომათა დარბაზში გადაინაცვლეს, სადაც ლეიბების შეტანა სცადეს, რის უფლებასაც დაცვის სამსახური არ აძლევდა, თუმცა მაინც შეძლეს. მოგვიანებით ისინი პოლიციამ გამოაძევა.

ზუგდიდის საკრებულოს თავმდჯომარეობის მოვალეობის შემსრულებელმა, ბესიკ ჭეჟიამ ოპოზიციის ბრალდებების საპასუხოდ განაცხადა, რომ საკრებულოში "განსაკუთრებული არაფერი არ ხდება". მისი მტკიცებით, მერია ბიუჯეტს ვადების დაცვითა და კანონიერად განიხილავს.

ამ თემას გამოეხმაურა პარტია საქართველოსთვის პოლიტსაბჭოს წევრი და დეპუტატი მიხეილ დაუშვილი, რომელმაც მოუწოდა ხელისუფლებას, რომ მუნიციპალური ბიუჯეტების დამტკიცება ძველი საკრებულოს პირობებში არ გაბედოს.