ნაციონალური მოძრაობის ზუგდიდის საკრებულოს მოშიმშილე წევრები სამართალდამცავებმა სხდომათა დარბაზიდან გამოაძევეს. ენმ-ის წევრის, ანა წითლიძის განცხადებით, ხელისუფლებას მოშიმშილე ადამიანების შეეშინდა, თუმცა ისინი პროტესტის განელებას არ აპირებენ.

"5 მოშიმშილის შეეშინდა დღეს ხელისუფლებას და 5 მოშიმშილე ძალის გამოყენებით ასე ათრიეს და ისე ჩამოათრიეს ქვევით ფრაქციის ოთახში. ეს არ არის პოლიცია, ეს არის ჩვეულებრივი მილიცია, რომელიც ასრულებს ერთადერთი ადამიანის, ბიძინა ივანიშვილის დავალებას. მათ უნდა იცოდნენ, რომ როგორიც არ უნდა იყოს მათი ეს ძალადობრივი ფორმები და რაც დღეს გააკეთეს და იკადრეს, ისინი მაინც ვერ შეძლებენ ვერც ამ პროტესტის მუხლის განელებას და მითუმეტეს ვერ შეძლებენ ზუგდიდელების ბიუჯეტის საკუთარ თავზე მორგებას", — ამბობს ის.

საკრებულოს დეპუტატებმა სხდომათა დარბაზში პროტესტის ნიშნად მას შემდეგ გადაინაცვლეს, რაც წითლაძემ განაცხადა, რომ ძველი მოწვევის საკრებულო ბიუჯეტის პროექტის დაჩქარებულად განხილვას ცდილობს. წითლიძე განმარტავს, რომ 2022 წლის ბიუჯეტზე საკრებულოს ის წევრები მსჯელობენ, რომლებიც საერთოდ არ არიან ახალი მოწვევაში. მისი თქმით, გაუგებარია რა პოლიტიკური პასუხისმგებლობა უნდა აიღონ ბიუჯეტის მიღებაზე ან შესრულებაზე იმ ადამინებმა, რომლებიც არ არიან საკრებულოს წევრები.

მოშიმილეებს დარბაზში ლეიბებისა და სხვა საჭირო ინვენტარის შეტანა სურდათ, რის უფლებასაც დაცვის სამსახური არ აძლევდა, თუმცა მაინც შეძლეს.

მოგვიანებით ზუგდიდის საკრებულოს თავმდჯომარეობის მოვალეობის შემსრულებელმა, ბესიკ ჭეჟიამ ოპოზიციის ბრალდებების საპასუხოდ განაცხადა, რომ საკრებულოში "განსაკუთრებული არაფერი არ ხდება". მისი მტკიცებით, მერია ბიუჯეტს ვადების დაცვითა და კანონიერად განიხილავს.