ზუგდიდის საკრებულოს თავმჯდომარის მოვალეობის შემსრულებელი, ბესიკ ჭეჟია აცხადებს, რომ ნაციონალური მოძრაობა კანონს არღვევს და საკრებულოს მუშაობას მიზანმიმართულად აფერხებს. მისი შეფასებით, ენმ-ის წევრების მიერ ზუგდიდის საკრებულოს სხდომათა დარბაზში მოშიმშილეთა შეყვანა დესტრუქციული ქმედებაა.

ბიუჯეტის დაჩქარებულად დამტკიცებაზე ოპოზიციის ბრალდებების საპასუხოდ, ის ამტკიცებს, რომ თავის ვალდებულებას ასრულებენ და "არაფერი განსაკუთრებული არ ხდება".

"მერიას აქვს ვალდებულება, რომ ყოველი წლის არაუგვიანეს 15 ნოემბრისა, მომდევნო წლის ბიუჯეტი განსახილველად შეიტანოს საკრებულოში, რაც შეასრულა კიდეც მერიამ. ამის შემდეგ საკრებულოს აქვს ვალდებულება, უზრუნველყოს ამ ბიუჯეტის პროექტის საჯაროობა, განიხილონ კომისიებსა და ფრაქციებში და შენიშვნებით უკან არაუგვიანეს 25 ნოემბრისა მიუბრუნოს მერიას განსახილველად. ზუსტად ამ პროცესებში ვართ დღეს. არაფერი განსაკუთრებული დღეს ზუგდიდის მუნიციპალიტეტის საკრებულოში არ ხდება", — აცხადებს ის.

ჭეჟია ამბობს, მისთვის ნაციონალური მოძრაობის პროტესტი გაუგებარია, მაშინ, როდესაც ბიუჯეტის განხილვა კანონიერ ვადებში მიმდინარეობს და ამაში როგორც ოპოზიციის, ასევე, მმართველი პარტიის დეპუტატები აქტიურად იყვნენ ჩართული.

"გაოცებული ვარ მათი ქმედებით, ოპოზიციის დეპუტატები თავიდან ბოლომდე, სრულფასოვნად, აქტიურად იყვნენ ჩართული კომისიურ განხილვებში", — ამბობს ჭეჟია.

დღეს, 17 ნოემბერს ზუგდიდის საკრებულოში ხმაური და დაპირისპირება იყო. საკრებულოს მოშიმშილე დეპუტატებმა სხდომათა დარბაზში პროტესტის ნიშნად გადაინაცვლეს, მას შემდეგ, რაც ნაციონალური მოძრაობის წევრმა, ანი წითლაძემ განაცხადა, რომ ძველი მოწვევის საკრებულო ბიუჯეტის პროექტის დაჩქარებულად განხილვას ცდილობს. წითლიძე განმარტავს, რომ 2022 წლის ბიუჯეტზე საკრებულოს ის წევრები მსჯელობენ, რომლებიც საერთოდ არ არიან ახალი მოწვევაში. მისი თქმით, გაუგებარია რა პოლიტიკური პასუხისმგებლობა უნდა აიღონ ბიუჯეტის მიღებაზე ან შესრულებაზე იმ ადამინებმა, რომლებიც არ არიან საკრებულოს წევრები.