საქართველოს დემოკრატიული ინიციატივის განცხადებით, მოსამართლეთა კონფერენციის ადმინისტრაციული კომიტეტის მიერ ადგილობრივი ორგანიზაციებისა და ქვეყნის უმნიშვნელოვანესი პარტნიორების კრიტიკის საპასუხოდ, მსგავსი რიტორიკის გამოყენება სასამართლოში კლანის არსებობას ადასტურებს. მათი შეფასებით, ეს დამაზიანებელია, როგორც ქვეყნის, ასევე, სასამართლო სისტემის იმიჯისათვის.

"განცხადებაში პარტნიორების მიერ გამოთქმული კრიტიკა შეფასებულია როგორც აშკარად გადაჭარბებული, დაუსაბუთებელი და წინააღმდეგობრივი. უფრო მეტიც, ისინი განცხადების ავტორებს დიპლომატიური ურთიერთობის შესახებ ვენის კონვენციის დარღვევაშიც კი ადანაშაულებენ. მსგავსი შეფასებები ნათლად მიუთითებს განცხადების ავტორთა კომპეტენციისა და კეთილსინდისიერების ნაკლებობაზე", — ვკითხულობთ GDI-ის განცხადებაში.

ორგანიზაციის თქმით, საყურადღებოა ის ფაქტიც, რომ განცხადების გავრცელებიდან მალევე, მოსამართლეთა ნაწილმა სოციალური ქსელების გამოყენებით ღიად დააფიქსირა განსხვავებული პოზიცია და გაემიჯნა განცხადებაში ჩამოყალიბებულ შეხედულებებს.

"საქართველოს სასამართლო სისტემაში დამოუკიდებლობისა და მიუკერძოებლობის ღრმა კრიზისის ფონზე, ადმინისტრაციული კომიტეტის მიერ გავრცელებული განცხადება კიდევ ერთხელ ადასტურებს სასამართლოს ფუნდამენტური და არსებითი რეფორმის საჭიროებას. ამ თვალსაზრისით, განსაკუთრებით მნიშვნელოვანია მოსამართლეთა შორის კრიტიკული აზრის არსებობა, რამაც არსებითად უნდა შეუწყოს ხელი სასამართლო ხელისუფლების გაჯანსაღების პროცესის დაწყებას", — აცხადებენ ორგანიზაციაში.

31 ოქტომბერს, არჩევნების მეორე დღეს იუსტიციის უმაღლესმა საბჭომ ორი ახალი მოსამართლე წევრი, პაატა სილაგაძე და გიორგი გოგინაშვილი აირჩია. ამ გადაწყვეტილებას კრიტიკა მოყვა, როგორც ადგილობრივ, ისე საერთაშორისო დონეზე.

კარლ ჰარცელმა განაცხადა, რომ ევროკავშირი კვლავ მზად არის მხარი დაუჭიროს საქართველოს, თუმცა დახმარება დამოკიდებული იქნება ძირითადი რეფორმების განხორციელებაზე. ევროკავშირის ელჩის თქმით, საბჭოს 2 წევრის არჩევა იყო ნაჩქარევი, გაუმჭვირვალე და არაკონკურენტული. მან ასევე აღნიშნა, რომ ეს იყო ბოლო 4 თვის განმავლობაში რიგით მე-5 უკან გადადგმული ნაბიჯი. აშშ-ის საელჩომაც განაცხადა, რომ ეს პროცესი არც კონკურენტული იყო და არც გამჭვირვალე. მათ ხაზი გაუსვეს, რომ შერჩევა მაშინ მოხდა, როდესაც ქვეყნის ყურადღება გადატანილი იყო მუნიციპალურ არჩევნებზე.

რაც შეეხება ადგილობრივ ორგანიზაციებს, საქართველოს დემოკრატიული ინიციატივის განცხადებით, ახალი წევრების არჩევა არის სასამართლოში არსებული ე.წ კლანის წარმატებული მცდელობა შეინარჩუნოს გავლენები. ახალგაზრდა იურისტთა ასოციაციაც ამბობს, რომ ეს კლანური მმართველობის მანიპულაციაა. დამოუკიდებელი იურისტების ჯგუფი კი აცხადებს, რომ მოსამართლეები ამჯერადაც მოწყვლადი აღმოჩნდნენ გავლენიანი ჯგუფის ნების წინააღმდეგ.

პასუხად მოსამართლეთა კონფერენციის ადმინისტრაციულმა კომიტეტმა განცხადება გაავრცელა, რომელშიც ამბობს, რომ შეფასებები გადაჭარბებული, დაუსაბუთებელი და წინააღმდეგობრივია და ეს გადაწყვეტილება ქვეყნის ევროინტეგრაციის პროცესს ვერანაირად დააზიანებს. მათივე აზრით, გაუგებარია, რატომ შეფასდა 31 ოქტომბერს კონფერენციის ჩატარება ნაჩქარევად, როდესაც ის საერთო სასამართლოების შესახებ საქართველოს ორგანული კანონის სრული დაცვით ჩაინიშნა. კომიტეტის განცხადებას 18 მოსამართლე ემიჯნება.

ამავე თემაზე: