ნაციონალური მოძრაობის წევრი, თამარ კორძაია აცხადებს, რომ პარტიის დამკვირვებლებმა გაყალბებული დოკუმენტით ხმის მიცემის ფაქტი აღმოაჩინეს. კერძოდ, საუბარია ნაძალადევის ერთ-ერთ უბანზე და ყალბ პირადობის მოწმობაზე.

"ჩვენ გვაქვს კონკრეტული ერთი ადამიანის 2 პირადობის მოწმობა, მაგრამ სახეები ემთხვევა ორივეში, ორივეში ემთხვევა დაბადების თარიღი, ორივეში ემთხვევა პირადი ნომერი, ორივე არის მოქმედი, მოქმედების ძალა აქვს 2031 წლამდე. არ ემთხვევა გვარი და არ ემთხვევა სერია პირადობის მოწმობის", — თქვა თამარ კორძაიამ.

გარდა ამისა, ბრიფინზე ჟურნალისტებს აჩვენეს ვიდეო, რომელზეც, კორძაიას თქმით, ჩანს 44-ე უბანზე მომხდარი ფაქტი — ადამიანი, რომელსაც აქვს დამკვირვებლის ბეიჯი, მიდის რამდენიმე პირთან, აძლევს ბეიჯს, შემდეგ კი ეს პირი ბეიჯიდან გაურკვეველ ნივთს იღებს. ენმ-ში ამბობენ, რომ ეს ფულია, ის პირები კი ქართული ოცნების წარმომადგენლები არიან.

გარდა ამისა, ბრიფინგზე კორძაიამ ისაუბრა სხვა დარღვევებზეც, მათ შორის, თქვა, რომ 100-მეტრიან რადიუსს არ იცავენ და მობილიზებელები არიან ქართული ოცნების წარმომადგენლები.

"ისნის მე-40 უბანთან დაფიქსირდა ფულის გადაცემის ფაქტი, ასევე მობილიზაცია კრიმინალური სამყაროს წარმომადგენლების. სამგორის 56-ე უბანთან იგივეა, ე.წ ძველი ბიჭების მობილიზება. საბურთალოს მე-20 უბანზე სცემეს დამკვირვებლები და ჟურნალისტს დაუმტვრიეს კამერა", — თქვა კორძაიამ.

კორძაიამ მოუწოდა შესაბამის ორგანოებს, დაიწყონ ყველა ფაქტზე გამოძიება.

დღეს, 30 ოქტომბერს ადგილობრივი თვითმმართველობის არჩევნების მეორე ტური იმართება. მერი 15 თვითმმართველ თემსა და 5 თვითმმართველ ქალაქში, მათ შორის, თბილისში აირჩევა. გარდა ამისა, მეორე ტური გაიმართება 24 საარჩევნო ოლქში, რომლის შედეგად აირჩევა 42 მაჟორიტარი.

გაიგე მეტი:

არჩევნების შესახებ ყველა სიახლეს შეგიძლიათ On.ge-ზე გაეცნოთ: