დღეს, 27 ოქტომბერს გამართულ სხდომაზე საქართველოს ეროვნული ბანკის მონეტარული პოლიტიკის კომიტეტმა რეფინანსირების განაკვეთის უცვლელად, 10%-ზე დატოვების გადაწყვეტილება მიიღო. როგორც ცნობილია, აღნიშნული განაკვეთი ამაზე მაღალი ბოლოს 2008 წელს იყო.

რეფინანსირების განაკვეთის უცვლელად, 10%-ზე დატოვება ეროვნული ბანკის მხრიდან გამკაცრებული მონეტარეული პოლიტიკის გაგრძელებად შეგვიძლია მივიჩნიოთ, რაც, თავის მხრივ, ქვეყანაში არსებული მაღალი ინფლაციით არის გამოწვეული.

რეფინანსირების განაკვეთი

რეფინანსირების განაკვეთი ეროვნული ბანკის ხელთ არსებული ინსტრუმენტია, რომლის საშუალებითაც ის ფასების სტაბილურობას უზრუნველყოფს. როდესაც რეფინანსირების განაკვეთი იზრდება, ამას მონეტარული პოლიტიკის გამკაცრებას უწოდებენ — ამ დროს მსესხებლებს აღნიშნულ განაკვეთზე მიბმული კრედიტები უძვირდებათ. შესაბამისად, ადამიანები ამცირებენ ხარჯვას, რის გამოც მცირდება საერთო მოთხოვნა — ეს კი ფასების ზრდას უშლის ხელს.

მიმდინარე წლის აგვისტოს დასაწყისში რეფინანსირების განაკვეთი 0,5 პროცენტული პუნქტით, 10%-მდე გაიზარდა, რის შედეგადაც 140 100 ადამიანს სესხის პროცენტი გაუძვირდა. სექტემბერში კი, ისევე როგორც მიმდინარე თვეში, სებ-მა განაკვეთის უცვლელად დატოვების გადაწყვეტილება მიიღო.

დღეს გამართულ სხდომაზე რეფინანსირების განაკვეთის უცვლელად დატოვება იმაზე მიანიშნებს, რომ ეროვნული ბანკი მომდევნო თვეებშიც მაღალ ინფლაციას ელოდება. როგორც სებ-ის მიერ გავრცელებულ განცხადებაშია ნათქვამი, მოსალოდნელია, რომ ინფლაცია 2022 წლის გაზაფხულიდან შემცირდება.

ინფლაცია

2021 წლის სექტემბერში, წინა თვესთან შედარებით, ინფლაციის დონემ საქართველოში 0,2%, ხოლო წლიურმა ინფლაციამ 12,3% შეადგინა.

საქსტატის ინფორმაციით, წლიურ ინფლაციაზე ყველაზე დიდი გავლენა სურსათზე ფასების ზრდამ მოახდინა — ამ სასაქონლო ჯგუფში პროდუქცია წლიურად 15,9%-ით გაძვირდა და იქიდან გამომდინარე, რომ სურსათი ადამიანების სამომხმარებლო კალათის დიდ ნაწილს შეადგენს, მასზე ფასების ზრდამ ინფლაციაში 4,99%-იანი წვლილი შეიტანა.

ამასთან, უნდა ითქვას, რომ ბოლო ერთი წლის ჭრილში ფასები გაზრდილია თითქმის ყველა სასაქონლო ჯგუფში გარდა კავშირგაბმულობისა და ტანსაცმლისა.

შეგახსენებთ, რომ ქვეყანაში მაღალი ინფლაციაა: აგვისტოში წლიური ინფლაციის დონემ ბოლო 10 წლის მაქსიმუმს, 12,8%-ს მიაღწია, ივლისში ინფლაცია — 11,9% იყო, ივნისში — 9,9%, მაისში — 7,7%, ხოლო აპრილსა და მარტში — 7,2%.

ეროვნული ბანკი ქვეყანაში არსებულ მაღალ ინფლაციას გლობალურ ფაქტორებს უკავშირებს და აღნიშნავს, რომ ამ უკანასკნელის წვლილი ფასების საერთო დონის ზრდაში დაახლოებით 8 პროცენტული პუნქტია.

"წინასწარი შეფასებით, ეგზოგენური ფაქტორების წვლილი მთლიან ინფლაციაში დაახლოებით 8 პროცენტული პუნქტია. ამ კუთხით გამოსარჩევია მსოფლიო ბაზრებზე აშშ დოლარით გამოხატული სურსათისა და, ბოლო პერიოდში კიდევ უფრო დაჩქარებული, ნავთობის ფასების მკვეთრი ზრდა, რასაც საერთაშორისო ტრანსპორტირების ხარჯების მაღალი ტემპებით ზრდაც ემატება", — ნათქვამია სებ-ის განცხადებაში.

ცნობისთვის, ეროვნული ბანკის მიერ დადგენილი ინფლაციის მიზნობრივი მაჩვენებელი 3%-ია.

გაიგეთ მეტი: