იავნანას სიმღერა, ოთახში წინ და უკან სიარული, მანქანით სეირნობა… ზოგიერთ ღამეს როგორც არ უნდა ვეცადოთ, მტირალ ბავშვებს ვერაფრით ვამშვიდებთ. იაპონელებმა ამ პრობლემიდან საინტერესო გამოსავალი იპოვეს — გადაღლილი მშობლები გვიანობამდე მომუშავე კაფეებსა და წიგნის მაღაზიებს სტუმრობენ, რათა მათმა პატარებმა თავისუფლად იტირონ.

ქალაქ მემუროში ფრანგული ტოსტების კაფე მშობლებისა და ჩვილებისთვის კვირა საღამოს 9 საათიდან ორშაბათ დილის 6 საათამდე ღიაა, თან მათ უფასოდ მასპინძლობს. კაფეში ხოხვისა და ძილისთვის სპეციალური სივრცეები, გამოსაცვლელი მაგიდები და საკვები კუთხეებია მოწყობილი. მომხმარებლებს შეუძლიათ მოდუნდნენ და დაისვენონ, რადგან იციან, რომ მათი შვილების ტირილი სხვებს ძილს არ დაუფრთხობს.

კაფეს მფლობელმა, მადოკა ნოზავამ, თავადაც მრავალი უძილო ღამე გაატარა შვილის ტირილის გამო, მაშინ, როცა მის მეუღლეს სამსახურში წასასვლელად ადრე უნდა გაეღვიძა. ახლა მას სხვა დედების დახმარება სურს: "მინდა, ეს იყოს თავშესაფარი, სადაც ადამიანები იგრძნობენ, რომ თავიანთ პრობლემებთან მარტონი არ არიან".

ფოტო: The Times

ქალაქ სეტოში კი, ერთ-ერთ წიგნის მაღაზიაში, ყოველთვიურად ეწყობა ჩვილთა ღამეები, რომლებსაც მოხალისეები უძღვებიან.

"ჯერ კიდევ არ მყავს ბევრი ადამიანი, ვისთანაც ბავშვის აღზრდაზე საუბარს შევძლებ, ამიტომ ასეთი ადგილი ჩემთვის ნამდვილი მხარდაჭერის წყაროა", — ამბობს ერთ-ერთი დედა.

ღამის კაფეების იდეა სათავეს ონლაინ მანგადან, Yonakigoya-დან, იღებს, რომელიც 2023 წელს ერთ-ერთმა დედამ გამოაქვეყნა. კომიქსის სათაური ითარგმნება, როგორც ღამის ტირილის სახლი — სივრცე, სადაც გადაღლილ დედებსა და ჩვილებს შეუძლიათ, რომ ღამით სტრესისგან განიტვირთონ.

ამ იდეამ მკითხველებში დიდი გამოხმაურება გამოიწვია და სოციალურ ქსელებში ვირუსულად გავრცელდა. ბავშვთა მოვლის ღამის სივრცეების შექმნას.

თუმცა, მიუხედავად იმისა, რომ იაპონია შობადობის მკვეთრ ვარდნას და დემოგრაფიულ კრიზისს ებრძვის, ეს სამოქალაქო ინიციატივები სახელმწიფო მხარდაჭერის გარეშე ხორციელდება და მთლიანად მოხალისეებზეა დამოკიდებული.