საფრანგეთის მუზეუმმა, Pompidou-Metz-მა, პოლიციას ბანანის ინსტალაციის მოპარვის შესახებ შეატყობინა. ბანანი იტალიელი ხელოვანის, მაურისიო კატელანის, მრავალმილიონიანი ინსტალაციის მთავარ ნაწილს წარმოადგენს.

დაკარგული ხილი, რომელიც კედელზე წებოვანი ლენტით იყო მიკრული, კატელანის პროვოკაციული ნამუშევრის, Comedian-ის (კომიკოსის), განუყოფელი ნაწილია.

მუზეუმის განცხადებით, უცნობი პირების წინააღმდეგ ქურდობის ფაქტზე სასამართლოში საჩივარი შეიტანეს. განცხადებაში აღნიშნულია ისიც, რომ ბანანი უკვე ახლით ჩაანაცვლეს. აღსანიშნავია, რომ ბანანი ყოველ სამ დღეში ერთხელ ისედაც იცვლება, რათა ახალთახალი იერი შეინარჩუნოს.

ფოტო: Daily Tribune

საინტერესოა, რომ ეს Comedian-ის დაზიანების პირველი შემთხვევა არაა. გასული წლის ივლისში, მუზეუმის ერთ-ერთმა დამთვალიერებელმა ბანანი ნამუშევრიდან ჩამოხსნა და იქვე მიირთვა. თუმცა, დაცვის თანამშრომლებმა მალევე ჩაანაცვლეს ნაჭამი ბანანი ახლით. მუზეუმს მაშინ სამართლებრივი ზომებისთვის არ მიუმართავს.

ამჯერად კი, მუზეუმის წარმომადგენლებმა სისხლის სამართლის საჩივრის შეტანა იმის გამო გადაწყვიტეს, რომ დამნაშავის ვინაობა არ იციან, შესაბამისად, მასთან დიალოგის შესაძლებლობაც არ აქვთ.

მუზეუმის წარმომადგენლებმა ასევე აღნიშნეს, რომ ბანანის განმეორებითი დაზიანება ხელოვნების ნიმუშისადმი უპატივცემულობას გამოხატავს.

კატელანის შემოქმედებამ, რომლის მიზანიც ხელოვნების ცნებისა და მისი ღირებულების ეჭვქვეშ დაყენებაა, აზრთა სხვადასხვაობა ჯერ კიდევ 2019 წლის Art Basel-ის გამოფენაზე, ინსტალაციის დებიუტისას გამოიწვია. ნამუშევრის საწყისი ფასი $120 000 იყო. თუმცა, მისი ღირებულება მას შემდეგ კიდევ უფრო გაიზარდა.

ჩინელმა კრიპტოდამფუძნებელმა, ჯასტინ სანმა, 2024 წელს ამ ნამუშევრის ერთ-ერთ ვერსიაში $5,2 მილიონი გადაიხადა, რამდენიმე დღის შემდეგ კი ის ჰონგ-კონგში, კამერების წინ შეჭამა.

ფოტო: Getty Images

გარდა Comedian-ისა, კატელანი ასევე ცნობილია 18-კარატიანი, სრულად ფუნქციონირებადი ოქროს უნიტაზის შექმნით, სახელწოდებით ამერიკა, რომელიც დონალდ ტრამპს პირველი ვადით პრეზიდენტობისას შესთავაზეს.

უნიტაზი 2020 წელს ორმა კაცმა მოიპარა და ნაწილებად დაშალა, რის შემდეგაც ნამუშევრის აღდგენა ვეღარ მოხერხდა.

ფოტო: Guggenheim Foundation