"იმ ექვს პოლიციელს, სადაც ბრძანდებიან, მინდა ვუსაყვედურო, თქვენ ამათ მიეცით სალაპარაკო და ყველა პოლიციელს ვთხოვ, რომ ნუ მივცემთ მტრებს სალაპარაკოს", — პარლამენტის ვიცესპიკერი თეა წულუკიანი პარლამენტის ტრიბუნიდან გორის ინციდენტს გამოეხმაურა. მისივე თქმით, "მტერი უფრო მეტი ჰყავს სახელმწიფო ინსტიტუტებს, ვიდრე შეიძლება მანამდე გვეგონა".

"მე მინდა ყველა პოლიციელს მივმართო, კიდევ ერთხელ ვუთხრა იმათ, ასეთი 99 და მეტი პროცენტი კანონის დაცვით გვიცავს და გვაძლევს ამ ქვეყანაში დაცულობის განცდას, ვინც არ უნდა ვიყოთ და მინდა, მოვუწოდო სიფრთხილისკენ. თქვენ გყავთ მტრები, ჩასაფრებულები და მათი აზრით, თქვენ უნდა დაზიანდეთ. გუშინდელი დაფდაფები, რომ გაუხარდათ რაც მოხდა, საზარელი სანახავი იყო ეს ყველაფერი და იმ ექვს პოლიციელს, სადაც ბრძანდებიან, მინდა ვუსაყვედურო, თქვენ ამათ მიეცით სალაპარაკო და ყველა პოლიციელს ვთხოვ, რომ ნუ მივცემთ მტრებს სალაპარაკოს.

...10 ადამიანიდან 6 არის დაკავებული და სწორედ ის ექვსი, სავარაუდოდ ის ექვსი, აბა სხვა ვინ იქნება? ექვსი იმიტომ, რომ ექვსი არის, ვინც ძალადობს, ამ ვიდეოს მიხედვით, ყოველ შემთხვევაში, ახორციელებს. მე დარწმუნებული ვარ, რომ თუ დანარჩენი რაღაც სხვაც გამოიკვეთება, ალბათ, რა ვიცი, მე მჯერა ამის, ყოველ შემთხვევაში, და ალბათ სხვასაც უნდა სჯეროდეს, მეორე პლანზე ვინც ზის, რომ სხვებთან მიმართებაშიც დადგება ის, რაც უნდა დადგეს.

ყველა პოლიციელს მე მინდა, მათ შორის გორის პოლიციაში მომუშავე ღირსეულ პოლიციელებს, შიდა ქართლის უფრო ფართო გაგებით [პოლიციელებს], დავუდასტურო პატივისცემა და ვუსურვო წარმატებები და ასევე ვუსურვო დიდი სიფრთხილე, იმიტომ რომ, როგორც ჩანს, მტერი კიდევ უფრო მეტია, ვიდრე შეიძლება ჩვენ წარმოგვედგინა და გორის ამ მართლაც საზარელმა კადრებმა, რომლებიც ვნახეთ, დაგვიდასტურა, რომ მტერი უფრო მეტი ჰყავს სახელმწიფო ინსტიტუტებს, ვიდრე შეიძლება ჩვენ მანამდე გვეგონა", — განაცხადა პარლამენტის ვიცესპიკერმა, თეა წულუკიანმა პარლამენტის ტრიბუნიდან.

შეგახსენებთ, რომ 27 მაისს, "ქართლის ამბებმა" გაავრცელა ვიდეო, სადაც ჩანს როგორ ძალადობს ფიზიკურად 10-მდე სამართალდამცავი ახალგაზრდა კაცზე. აღნიშნულ ფაქტზე პროკურატურამ პოლიციელთა მხრიდან სამსახურებრივი უფლებამოსილების სავარაუდო ძალადობით გადამეტების მუხლით გამოძიება უკვე დაიწყო. დაკავებულია 6 პოლიციელი.

გორში პოლიციელების მიერ ნაცემი პაპუნა ლოცულაშვილის ჯანმრთელობა 29 მაისის ღამეს დამძიმდა და კლინიკაში გადაიყვანეს