ჩვენს ქვეყანაში არ არსებობს რეალური რისკი, რომ დენგე გავრცელდეს, — ამის შესახებ ჯანდაცვის სამინისტროს დაავადებათა კონტროლისა და საზოგადოებრივი ჯანმრთელობის ეროვნული ცენტრის გენერალური დირექტორის მოადგილემ, პაატა იმნაძემ "პირველ არხთან საუბრისას განაცხადა.

მისივე განმარტებით, პაციენტი, რომელსაც ვირუსი დაუდასტურდა, უკვე გამოჯანმრთელდა და საავადმყოფოს, სადაც ის იწვა, დეზინფექცია ჩაუტარდა.

"მთავარია, რომ ადგილობრივი გადაცემა ჩვენთან არ არის აღწერილი. მაგალითად, სამხრეთ ევროპის ქვეყნებში ადგილობრივი შემთხვევები უკვე აღწერილია და ეს გადამტანით გადაცემადი დაავადებაა. ასე რომ, გადამტანი თუ არ არის, იქ ვერ გავრცელდება. პაციენტი უკვე გამოჯანმრთელებულია. საავადმყოფოში, სადაც იწვა, ჩატარებულია დეზინფექცია, ანუ მწერების საწინააღმდეგო ღონისძიებები. ეს ჩვეულებრივი პროტოკოლია. ჩვენს ქვეყანაში არ არსებობს რეალური რისკი, რომ დენგე გავრცელდეს. პაციენტი გამოჯანმრთელებულია და თავის ქვეყანაში დაბრუნდა", — განაცხადა პაატა იმნაძემ.

შეგახსენებთ, მანამდე იაშვილის სახელობის ბავშვთა ცენტრალური საავადმყოფოს სამედიცინო დირექტორმა, ივანე ჩხაიძემ "პირველ არხს" დაუდასტურა, რომ საქართველოში დენგეს ვირუსი დაფიქსირდა.

როგორც ცნობილია, დენგეს კოღოს ნაკბენით გადამდები ვირუსული დაავადებაა. მისი საინკუბაციო პერიოდი, როგორც წესი, 5-დან 7 დღემდე გრძელდება, თუმცა კლასიკური ფორმის შემთხვევაში შესაძლოა 15 დღემდეც გაიზარდოს. დაავადება შემცივნებითა და მაღალი სიცხით (39-41 გრადუსი) იწყება, რასაც თან ახლავს ძლიერი თავის, სახსრებისა და კუნთების ტკივილი.