შინაგან საქმეთა სამინისტრომ ბსუ-ის პროფესორის, ნანი გვარიშვილის და აქტივისტების დაპირისპირების საქმეზე გამოძიება ძალადობის მუხლით დაიწყო.

28 მაისს ბათუმის სახელმწიფო უნივერსიტეტთან სტუდენტები თაკო სურმანიძე და ნონა მირზოევა დიუშენით დაავადებულთა მხარდამჭერ ხელმოწერებს აგროვებდნენ, რა დროსაც მათთან ლექტორი ნანი გვარიშვილი კონფლიქტში შევიდა. სტუდენტებმა ბათუმელებთან საუბარში განაცხადეს, რომ გვარიშვილი თავიდანვე აგრესიული იყო, შემდეგ კი სტუდენტს შემოარტყა და ტელეფონი გააგდებინა.

"ამ ქალმა თითის ქნევით დამიწყო ჭკუის სწავლება და ყვირილი, რომ არაფერი არ ვიცი, რძე არ შემშრობია და სახელმწიფომ ძალიან კარგად იცის, ვინ უნდა დააფინანსოს.
ამ აგრესიის გადაღება დაიწყო მობილური ტელეფონით ჩემმა მეგობარმა, ნონა მირზოევამ. ქალბატონი კიდევ უფრო გაღიზიანდა, როცა შენიშნა, რომ უღებდნენ და პირდაპირ ხელში სწვდა ნონას, მას ხელიდან დააგდებინა ტელეფონი… ამიტომაც შეწყდა ვიდეოს ჩაწერა.
ამის შემდეგ ხელზე რამდენჯერმე დაარტყა ამ პროფესორმა ნონას და თან ორივეს გვლანძღავდა," — უთხრა ბათუმელებს თამარ სურმანიძემ.

ვიდეოში ჩანს, რომ ნანი გვარიშვილი მეუღლეს ეუბნება, რომ პოლიცია გამოიძახოს, მაგრამ მოგვიანებით გადაიფიქრა. გვარიშვილი ტვ პირველის ჟურნალისტთან საუბრისას ამტკიცებდა, რომ "ვიდეო დამონტაჟებულია" და დასძინა, რომ ახალგაზრდებს მოქცევა უნდა ვასწავლოთ.

"ეს ვიდეო არის დამონტაჟებული, შენობით რომ მიმართავს პროფესორს... ჯერ ახალგაზრდებს ასწავლეთ, როგორ უნდა მოიქცნენ უნივერსიტეტის ეზოში" — ამბობს ბსუ-ის ლექტორი ნანი გვარიშვილი ტვ პირველთან საუბრისას.